“Duterte for Inday Sara Movement 2028” gilusad
CEBU, Philippines — Opisyal nga gilusad sa Cebu ang “Tatay Digong for Inday Sara Movement 2028” pinaagi sa usa ka press conference nga gipahigayon niadtong Domingo sa hapon, Pebrero 15.
Tumong sa kalihukan ang pagpadayag sa suporta ug panaghiusa sa posibleng kandidatura ni Vice President Sara Duterte sa 2028 elections, samtang gipasidunggan usab ang liderato sa iyang amahan, si kanhi Presidente Rodrigo Duterte, nga mas nailhan isip “Tatay Digong.”
Gitambongan kini sa mga supporter, organizer, ug mga representante gikan sa nagkalain-laing sektor aron ipresentar ang ilang plano ug direksyon sa pagpalapad sa suporta sa rehiyon.
Ang launching gipanguluhan ni Jing Paras, kanhi representante sa 1st District sa Negros Oriental, uban sa mga lokal nga lider sa Cebu nga sila Jun Abines, Moises Deiparine, ug Melchor Empleo, ug uban pa.
Sumala sa mga convenor, magsugod sa umaabot nga mga bulan ang serye sa mga aktibidad ug grassroots mobilization aron mapalig-on ang organisasyon ug mapalapdan ang suporta sa tibuok probinsya sa Cebu.
Gipadayag ni Paras ang doble nga tumong sa kalihukan nga mao ang paghatag pasidungog kang Tatay Digong ug ang pagtukod og lig-on nga politikal nga suporta alang kang Vice President Sara Duterte.
Suma pa usab ni Jun Abines usa sa mga local nga lider nga mahinungdanon ang Cebu isip lugar sa launching tungod sa historikal, kultural, ug politikal nga papel niini.
Matod niya, ang panagtapok gitumong dili lamang sa paghiusa sa mga supporter kundili usab sa pagpalambo sa dayalogo, pagkat-on, ug kolaborasyon tali sa lokal ug nasyonal nga mga lider.
Si Atty. Salvador Diputado, kanhi DA-7 Regional Director ug pangulo sa Lawyers for Sara Duterte, mipadayag nga dugay na ang ilang gihimong pagpangandam. (BANAT NEWS)
- Latest
