VISCOM: Walay nang-resign

CEBU, Philippines — Nunot niining mga nanggawas sa social media nga mga post bahin sa mga sundalo ug mga polis nga nag-ingong wala na sila ganahi sa gobiyerno karon maong nang-resign sila sa serbisyo, ang Visayas Command (VisCom) ug Cebu City Police Office mihimakak niini.

Ang tigpamaba sa kampo nga si Lieutenant Colonel Israel Galorio miingon nga wala sila'y mga sakop nga nang-resign  tungod sa nahitabo kang kanhi presidente Rodrigo Duterte nga gidakop ug toa na sa International Criminal Court tungod sa kasong crime against humanity.

Si Galorio miingon nga wala silay nadawat nga reports gikan sa ilang nagkalain-laing unit sa ubos nga dunay unusual filing of resignation sa ilang mga sundalo.

Gipasalig ni Galorio nga ang Visayas Command isip miyembro sa Armed Forces of the Philippines (AFP) nagpabiling professional ug non-partisan organization nga nagtamod sa ilang constitutional mandate.

"We uphold the rule of law and adhere to the chain of command. Our personnel remain focused to our sworn duty of ensuring the safety and security of our people here in the Visayas region," sigon pa ni Galorio.

Samtang si Police Lieutenant Colonel Maria Theresa Macatangay, Deputy City Director for Operations ug tigpamaba sa CCPO  mibutyag nga wala sila'y na-monitor nga mga personnel nga ni-resign o kaha nagplano nga mo resign sa serbisyo tungod sa nahitabo ni Duterte.

Matud niya dili angay mabalaka kay nagpabilin silang lig-on ug dedicated sa tahas nga gisangon kanila. Gipahibawo sab niya nga balik sa normal ang alert status gikan sa pagdeklarar og heightened alert ang PNP tungod sa pagdakop sa kanhi presidente.

Magpadayon sila sa monitoring sa mga posibleng kalihukan nga buhaton sa anti ug pro Duterte aron pabiling malinawon ug walay kasamok nga mahitabo sa siyudad tungod ani. --Decemay P. Padilla/IBM

Headline inflation sa Probinsiya sa Sugbo nisaka sa buwan sa Pebrero

Ang headline inflation sa Probinsiya sa Sugbo nitala og mas paspas nga annual growth rate nga 3.5 porsyento niadtong Pebrero 2025 gikan sa 3.2 porsyento niadtong Enero sa samang tuig.

Kini nagdala sa average nga inflation sa probinsiya gikan sa Enero hangtud  sa Pebrero 2025 ngadto sa 3.3 porsyento.

 Niadtong Pebrero 2024, natala kini sa 0.2 porsyento nga tinuig nga pagkunhod.

Ang uptrend sa headline inflation sa Pebrero 2025 naimpluwensiyahan sa mas paspas nga tinuig nga pagtubo sa mga index sa transportasyon nga niabot sa 10.9 porsyento gikan sa 6.5 porsyento sa Enero 2025 ug pabalay, tubig, elektrisidad, gas ug uban pang mga gasolina sa 1.8 porsyento sa buwan gikan sa 0.9 porsyento sa Enero 2025.

Subay niini, ang mga index sa mosunod nga mga grupo sa palaliton nga nakatala og mas hinay nga year-on-year nga pagsaka mao ang food and non-alcoholic beverages nga 4.2 porsyento gikan sa 4.7 porsyento; alcoholic beverages ug tabako nga 1.9 porsyento gikan sa 2.5 porsyento; health nga 1.5 porsyento gikan sa 1.6 percent; recreation, sport ug culture nga 0.6 porsyento gikan sa 0.9 porsyento; ug personal care, ug miscellaneous goods ug services nga 2.2 porsyento gikan sa 2.3 porsyento.

Samtang ang commodity groups nga nagpabilin sa ilang niaging buwan nga inflation rates mao ang clothing ug footwear nga 0.1 porsyento; furnishings, household equipment and routine household maintenance nga 4.2 porsyento; information and communication nga 0 porsyento; education services nga 7.2 porsyento; restaurants and accommodation services nga 0 porsyento; ug financial services nga 0 porsyento.

Ang nag-unang tulo ka commodity groups nga nakatampo sa Pebrero 2025 headline inflation sa probinsiya mao ang food and non-alcoholic beverages nga adunay 48.5 percent share o 1.7 percentage points; transportasyon nga adunay 28.8 porsyento nga bahin o 1.0 percentage points; ug Balay, tubig, elektrisidad, gas ug uban pang mga sugnod nga adunay 11.0 48.5 percent share o 0.4 percentage points.

Sa laing bahin, nikunhod ang food inflation sa Probinsiya sa Sugbo ngadto sa 4.4 porsyento niadtong Pebrero gikan sa 4.9 porsyento niadtong Enero niining tuiga.

Ang pagkunhod tungod sa hinay nga pagsaka sa presyo sa mais, prutas, karne ug bugas diin ang presyo sa bugas nikunhod og 3.4 porsyento kompara sa 2.0 porsyento sa Enero.  Apan mas paspas nga inflation ang natala sa isda, seafood, ug mga utanon.

Ang inflation sa pagkaon nakatampo og 46.7 porsyento sa kinatibuk-ang inflation diin ang pinakadako nga kontributor mao ang mga cereal (lakip ang bugas, mais, ug pan), isda ug seafood, ug karne. BDB BANAT NEWS