46 ka lungsod ug siyudad sa probinsiya sa Sugbo apektado sa El Niño  

CEBU, Philippines — Niabot sa 46 ka lungsod ug siyudad sa Probinsiya sa Sugbo ang nakaangkon og kadaot ug naapekto ang nagkadaiyang sektor niini tungod sa grabeng kainit dala sa El Niño.

Base sa Provincial Disaster Risk Reduction and Management Office (PDRRMO) nga 33 ka local government units ang nitaho sa kakulang sa suplay sa tubig sa pipila ka barangay niini hinungdan nga nagpahigayon og pagrasyon sa tubig.

Sama sa Lungsod sa Badian diin ang Local Disaster Risk Reduction and Management Office (LDRRMO) niini nitaho nga adunay pagkunhod sa gidaghanon sa tubig sa 14 ka tinubdan niini.

Sa Lungsod sa Boljoon, adunay 60 porsyento nga pagkunhod sa agas sa tubig sa pipila ka dapit niini.

Samtang sa Siyudad sa Carcar, niabot sa 15 ka barangays ang nakasinati og service interruption ug ang Can-asujan dam ang gikatahong anaa na pod sa critical level.

Ang Lungsod sa Sogod, tulo ka tinubdan sa tubig niini ang niubos usab ang suplay.

Nasayran nga 23 usab ka LGU ang nitaho sa pagkunhod sa produksiyon sa tanom o crops ug kadaot sa agrikultura.

Sa Dakbayan sa Naga, niabot sa 50 porsyento sa high-value crops niini ang apektado samtang 2,500 ka punoan sa saging sa Lungsod sa Moalboal ang nangadaot usab tungod sa grabeng kainit.

Ang Lungsod sa Dalaguete nga maoy vegetable basket sa Sugbo nitaho nga tulo sa ilang barangay ang nikunhod ang produksiyon sa utanon.

Sa susamang datos nga gihatag sa PDRRMO, 12 ka LGUs ang nitaho sa nagkadaiyang heat-related health incidents tungod sa grabeng kainit sama sa skin rashes, heat strokes ug uban pa.

Ang maong mga medical nga panginahanglan nahatagan na og pagtagad sa matag Rural Health Unit (RHU) sa mga lungsod ug siyudad.

Ang mga lungsod sa Asturias, Argao, Balamban, Borbon, Badian, Bantayan, Consolacion, Daanbantayan, Malabuyoc, Minglanilla, Moalboal, Poro, Tabogon, Ginatilan, Alegria, Pinamungahan, Alcantara, Dalaguete, San Fernando, Sibonga, Dumanjug, Liloan, Samboan, Cordova, ug Barili lakip na ang mga siyudad sa Mandaue, Toledo, Naga, Talisay ug Bogo ang nitaho sa pipila ka grass fire nga insidente. Hinuon walay natala nga casualty o namatay tungod sa grabeng kainit nga nasinati sa Probinsiya sa Sugbo base sa taho sa PDRRMO.

Matud ni Neil Sanchez, hepe sa PDRRMO nga ang mga LGU ang una nga mohatag og pagtagad sa epekto sa huwaw ngadto sa nagkadaiyang sektor sa matag lungsod ug siyudad.

Mosulod ra ang Kapitolyo kon wala nay nahabilin nga resources ang usa ka LGU.

Nunot niini, gipahinumduman sa Talisay City Veterinary Office ang mga namuhi og iro nga i-monitor ang ilang mga binuhi ilabi na nga padayon nga nasinati ang grabe nga kainit sa panahon.

Si Dr. Ma. Christine Hope Dejadena, city veterinarian sa siyudad nagkanayon nga dili lang ang tawo ang makasinati og heatstroke lakip usab ang mga mananap.

Matud ni Dejadena nga likayan nga mabuwad og dugay sa init ang mga iro tungo kay ma-dehydrate usab kini ilabina kong walay tubig nga mainom. BDB BANAT NEWS