192 ka tawo na operahan sa mata

CEBU, Philippines — Si Archbishop Jose Palma uban sa kaparian sa Archdiocese of Cebu  nangulo sa thanksgiving mass sa kalamposan sa 192 ka tawo nga gioperahan sa cataract ug pterydium ug uban usab sa Cebu Caritas Inc., Eye Hear Foundation Inc. ug Raise Me Up Group and Health Services Center-Central AFPHSC kagahapon sa buntag diha sa Archbishop Compound.

Ang duha ka adlaw nga operasyon gipahigayon niadtong Mayo 16 ngadto sa 17, 2023 sa Camp Lapu-Lapu Central Command Visayas sa Barangay Lahug, Dakbayan sa Sugbo. Ang maong gidaghanon san a operahan naggikan sa nagkadaiyang lugar sa Sugbo ug lakip usab sa Mindanao.

Atol sa Santos nga Misa mapasalamaton si Palma sa tanang mga nitabang aron magmalamposon ang gipahigayon nga operasyon.

Human sa Santos nga Misa gihimo usab ang ceremonial nga pagtangtang sa bandage sa tulo ka tawo nga naoperahan.

Si Ricardo Ylaya ang mapasalamaton human sa dugay nga katuigan nahatagan na siya og kahayag diin na operahan siya nga libre.

Si Fr. Gio Abastillas, secretary ni Palma nagkanayon niabot ngadto sa 600 ka tawo ang nagtinguha nga makaapil sa maong operasyon apan niabot lang sa dul-an 200 ang nakapasar tungod sa kota sa mga mo opera.

Matud ni Abastillas nga malaumon siya nga kong adunay mosunod nga operasyon ang mga wala maapil maoy unang hatagan og pagtagad nga maserbisyohan.

Gidasig usab ni Abastillas kadtong mga adunay katakos nga motabang nga mopaambit usab sa ilang mga grasya ngadto sa maong organisasyon nga nipahigayon sa maong operasyon. (BANAT NEWS)