Senior citizens sa Mandaue hatagan na sa ayuda
CEBU, Philippines — Gikatakda na karong Mayo 23 hangtud sa Mayo 27, 2022 ang pagpanghatag sa una nga pinansiyal nga ayuda alang sa mga senior citizens sa siyudad sa Mandaue.
Kini ang gipahibalo ni Konsehal Cesar Sol Cabahug, chairman sa committee on senior citizen affairs sa konseho sa maong dakbayan.
Nasayran una na nga nakadawat og tabang pinansyal ang mga person with disability PWDs sa maong dakbayan niadtong miaging semana.
Mokabat sa P3, 000 ang nadawat sa mga PWD's sa unang hugna samtang P 4, 000 ang dawatonon sa mga senior citizen sa unang hugna nga pagpanghatag sa kagamhanan karong tuiga.
Gikatakda usab ang pagpanghatag na sa P5, 000 nga fuel subsidy sa mga tricycle driver ug operator nga nalangan tungod sa gipatuman nga election ban sa Commission on Elections.Lakip usab sa gitakda nga ipanghatag ang P3, 000 nga pinansiyal nga ayuda alang sa mga nabiktima sa bagyong Odette.
Sa nasayran aduna pay mga biktima sa bagyo ang wa pa makadawat og ayuda sa gobyerno apil na kadtong nakasinate og pagkaguba sa ilang mga pinuy-anan gumikan sa bagyo. —MEL (BANATNEWS)
- Latest
