Pagpakunhod sa pletihan sa tricycle sa Mandaue ipatuman

CEBU, Philippines — Hayan ipatuman sunod semana ang pagpakunhod sa pletihan ingon man pagbalik sa full capacity sa pasahero sa mga tricycle sa siyudad sa Mandaue.

Kini nahukman atol sa gihimong panagtigum sa mga sakop Mandaue City Tricycle Franchising and Regulatory Board (MCTFRB) niadtong miaging adlaw.

Si Konsehal Jimmy Lumapas, chairman sa committee on transportation sa konseho sa Dakbayan sa Mandaue miingon nga nakahukom sila sa pagpakunhod sa plitehan sa mga tricycle tungod sa reklamo sa mga sumasakay.

Nagkanayon ang konsehal nga gikan sa P20 himoon na lang kini nga P10 pesos ug ibalik na usab ang full capacity sa mga tricycle.

Gihangop sa mga sumasakay ang maong lakang ug suma pa ni Susan Amistoso sa barangay Pagsabungan nga gumikan sa kamahal sa plite sa tricycle maglakaw na lang siya kun mangompra sa merkado.

Ang tricycle driver nga si Nicanor Luna nga taga Sector 6 sa Pagsabungan ang wa mahinangop sa pagbalik na sa full capacity sa ilang mga pasahero.

Kini tungod kay daghan sa mga driver ang nakauyon na sa P20 nga plite bisan limitado lang sa duha ka pasahero ang gitugot nga makasakay.

Pag-usab sa rota

Nakadawat na og certificate of compliance ang kagamhanan sa Dakbayan sa Lapu-Lapu nunot sa hingpit na nga pag-aprobar sa buhatan sa Land Transportation Franchising and Regulatory Board (LTFRB) 7 sa ilang gisumitir nga Local Public Transport Route Plan (LPTP) nga gipasikad ubos sa Public Utility Vehicle Modernization  Program (PUVMP) sa nasudnong kagamhanan.

Si LTFRB 7 Director Eduardo Montealto Jr.  maoy personal nga nagtunol ngadto kang Mayor Junard Ahong  Chan sa Notice of  Compliance ,(NOC) nga maoy mahimong basehanan sa lokal nga kagamhanan sa paghimog kausaban sa dagan sa mga sakyanan. Lakip sa pagahimoon mao ang pagbalhin sa mga sakyanan nga pasaheroan og agianan ngadto sa dalan nga gamay lang ang molabay nga mga sakyanan nga pasaheroan.

Gitataw ni Montealto nga tumong niini mao ang pagpaluag sa mga naghuot nga mga karsada. MEL (BANATNEWS)