P1.9 milyones nadagit sa repa-scam

CEBU, Philippines — Pito ka mga tawo ang nidangop sa Criminal Investigation and Detection Group (CIDG)-7 aron mopasaka og reklamo batok aning RePa Paluwagan human sila nailad og gibanabana tanan og P1.9 milyon.

Sa pakighinabi sa mga sakop sa media sa pipila sa mga nireklamo kinsa nihangyong dili magpaila, usa ka ginganlan niya’g Maria Cristina ang wala mouli sa iyang P100 mil gikan sa RePa.

“Ang permiro nakong gi-avail is 17k turns to 32k atong last September, and then kay kani laging curious lagi ko nangutana ko niya unsay paagi nganong kadako man og tubo sa kwarta,iyang explanation is Paluwagan,” sigun pa niya sa mga sakop sa media.

Matud niya gisultihan siya ni Maria nga kining RePa usa ka pamaagi kun diin adunay mga miyembro nga wala na makapaabot sa ilang turno pagdawat sa kuwarta sa ‘Paluwagan’ busa ang uban mobaligya sa ilang slot sa mas ubos nga presyo ug mao kini ang ilang gitawag og ‘RePa’.

“So mao to naengganyo ko mao tong niingon ko nga kung pwede ko magpa-legit-check sa imong timeline sa Facebook, tuod man daghan ni confirm nga legit,” sigun niya.

Tungod lagi kay ‘legit’  man matud sa mga komento diha sa iyang Facebook nadani siya  ug ni-invest sugod niadtong Septiyembre 1 ning tuiga og P17 mil ug siya gipasaligang ma-doble kini ini og balik kaniya.

Apan sa dihang naningil na siya human sa tagal giingnan siya ni Maria nga na-freeze ang account sa nahisgutang slot ug dili na mabayran ang giingong P32 mil nga interest ug ang magpabilin mao nalang ang iyang P17 mil nga puhonan.

Ang reklamante nisugot nga buhian kini ug mi-avail na hinuon og laing slot sa paluwagan gamit ang susamang kantidad nga mao unta ang iyang unang ‘release’ sa investment.

“So mao to akong gi kwenta-kwenta ang ubang post niya sa Repa mao tung nasalinan nalang kog 1,400 which is iyang gipadala through a remittance center….hangtod nga naabot sa panahon ang last nakong gi avail is ang 36k which turns to 40 plus something in the month of October,” dugang niya.

Nakurat nalang siya sa dihang gipahibawo sila ni Maria nga nagsugod na sa pagkapakyas ang investment scheme. Anang panahona niabot na og P121 mil ang puhunang iyang napagawas ug wala na mabalik kaniya.

“Sa ako tung savings..sobra gyud sa pagmahay, kalagot pud kay wala jud koy nadawat na refund. Iya daw ko tagaan og refund 2,250, wala nako dawata kay wala gani na naka ? sa akong gi invest,”matud niya. Ang maong savings iyang gitigom para sa college tuition sa iyang mga anak.

Si Police Colonel Ireneo Dalogdog, CIDG-7 Regional Chief niingon nga ilang tabangan ang nahisgutang mga reklamante ug mangayo sila og mga ebidensiya nga aron pagpa-matuod sa ilang mga reklamo.

Kagahapon (Biyernes), ang CIDG-7 nakapasaka og 25 ka kaso batok sa mga admins sa nagkadaiyang Repa investment scam sa Probinsya sa Bohol nga gibanabanang mokabat sa P233 milyones nga wala na mauli sa mga investors.— IBM (BANATNEWS)