Nangaligo sa dagat gipapauli kay dagko ang bawod

CEBU, Philippines — Mga tawong nangaligo og dagat sa kabaybayonan sa Dakbayan sa Talisay gipapauli tungod kay nagpabiling peligro ang gidak-on sa dagat karon ug ang dagkong bawod mugna sa hanging habagat. Si Alvin Santillana, pangu City Disaster Risk Reduction Management Office (CDRRMO) misuroy sa mga barangay sa kabaybayonan ug gihangyo ang mga tawo nga likayan ang pagkaligo sa dagat.

Si Santillana uban sa mga sakop sa Philippine Coastguard nga nagbase sa Siyudad sa Talisay nitagsa-tagsa sa mga tawo nga nangaligo sa dagat nga mohaw-as.

Siya nagkanayon nga niadto pang miaging adlaw sila nagsige og roving aron masiguro nga luwas ang tanan. “Dili pa gyud pwede. Wala sab nanagat due to rough seas,” sigon pa ni Santillana.

Una niini, usa ka dalagita ang namatay human nakainom og ilimnong makahubog ug naligo sa dagat bisan paman sa kakusog sa bawod niadtong miaging adlaw.

Si Santillana nibutyag nga dili mahimo nga masundan pa ang panghitabo.— IBM (BANATNEWS)