200 polis mobantay sa CVRAA

CEBU, Philippines — Moabot sa 200 ka mga polis gikan sa Regional Mobile Force Battalion, Cebu Police Provincial Office, Mandaue City Police Office ug Lapu-Lapu City Police Office ang gi-augment sa Cebu City Police Office aron motabang sa pagbantay sa seguridad sa Central Visayas Regional Athletic Association (CVRAA) sugod ugma, Mayo 2 hangtud na petsa 9 sa samang buwan.

Kagahapon gihimo ang pre-deployment sa maong mga police augmentation nga mobantay sa 38 ka venues sa CVIRAA.

Matud ni Police Colonel Ireneo Dalogdog, City Director sa Cebu City Police Office nga sa mga billeting areas duna say mga police personnel nga nagbantay.

Ang mga delegado sa nagkadaiyang probinsiya sa rehiyon dunay escort nga mga polis nga mobantay kanila.

“Like for instance kining sa Negros, Bohol, ang Negros ug Bohol pud ang magpadala og personnel, every billeting area naay six personnel naka assign para magbantay sa mga delagates or sa atong mga participants,” sigon ni Dalogdog.

Gipaabot ni Dalogdog ang direktiba ni Chief PNP Police General Rommel Marbil nga kadtong mga polis nga naka patrol duty dili magduwa sa cellphone gawas lang kung emergency unya mopadala og report.

Kun masakpan dili gyud pasayloan ug mag-atubang gyud og administrative case ug ang ilang commander relibuhan.

“Mao lang na siya’y exemption halimbawa naay emergency kinahanglan ka mag submit og report mao lang to’y exemption pero other than that basin magdula ka, games or unsa lang imong purpose para malingaw ka sa cellphone ginabawalan gyud na siya, gina encourage namo sila nga while on patrol duty mag matngon sa palibot, mag observe para kung naay ginagmay nga kasikas ila dayon matagaan og action,” ni Dalogdog pa.

Sa pikas bahin, gipaniguro sa mga nagdumala sa Central Visayas Regional Athletic Association kon CVRAA Meet nga walay mga atletang mabuwad sa grabeng kainit sa panahon  karon.

Si Cebu City Sports Commission Chairman John Pages mipasalig niini atol sa press conference nga gipahigayon kagahapon Lunes sa buntag.

Matud pa ni Pages, walay outdoor games nga ipahigayon gikan sa alas-9 sa buntag ngadto sa alas-3 sa hapon aron walay mabuwad sa adlaw.

Si Nimfa Bongo, ang Cebu City Schools Division Superintendent nibutyag nga ang outdoor events sugdan alas -6 sa buntag ngadto sa alas-9 sa buntag ug mobalik sa alas-3 sa hapon ngadto sa alas-8 sa gabii. Ang rehiyonal nga director sa DepEd-7 Salustiano Jimenez nitug-an nga ilang himoon ang mga pamaagi nga ilang gihimo didto sa Carcar City atol sa CVRAA sa nilabay nga tuig, tungod kay sa pagkakaron nasinati gayud ang grabe nga kainit sa panahon.— IBM BANAT NEWS