Quarantine violators sa Consolacion gihipos

CEBU, Philippines — Tungod sa pagsaka og balik sa mga kaso sa coronavirus sa probinsya sa Sugbo, subling gipangusgan sa mga local government units ang pagbantay batok sa mga wala motuman sa mga health protocols sama sa gilusad nga One Time Big Time Apprehension of COVID violators operation sa lungsod sa Consolacion.

Si Police Major Verniño  Noserale, hepe sa  Consolacion Police Station miingon nga nagtinabangay sila sa lokal nga kagamhanan sa lungsod, Department of Social Welfare and Development, (DSWD) Bureau of Fire Protection (BFP) Philippine Army, Consolacion Task Force ug ang mga force  multipliers sa nahisgotang lungsod.

Ang operasyon gilusad pagsugod sa curfew alas-10 sa gabii. Niresulta kini sa pagkasikop sa 76 ka tawo apil ang 23 ka mga bata.

Sa 53 ka hamtong , sagad sa ilang kalapas mao ang curfew, wala motuman sa social distancing, nag-inom daplin sa karsada. Ang 23 ka mga minor de edad gitugyan ngadto sa buhatan sa DSWD  ug gipatawag ilang ginikanan. Samtang gipaubos sa PNP CARE Lecture ug giisyuhan og tickets ang mga hamtong nga violators.

Sa pikas bahin, nagplano ang kagamhanan sa Dakbayan sa Lapu-Lapu nga gamiton ang mga pangpublikong tulunghaan isip isolation facility sa mga magposibtibo sa coronavirus disease.

Si Dr.  Agnes Realiza, pangulo sa Lapu-Lapu City Health Department namahayag nga pagpangandam kini nunot sa pagsaka og balik sa kaso. Apan kinahanglan pa nila og pagtugot sa Department of Education.

Samtang si Cindi Chan, chairperson sa City Tourism Cultural and Historical Affairs  Commission (TCHAC) miingon nga ang Department of Tourism (DOT) nag-accredit na og unom ka mga hotels sa dakbayan aron himuong isolation facility.

Sa maong mga hotels dad-on ang mga Returning Overseas Filipino (ROFs) nga naglakip sa mga immigrants ug mga Overseas Filipino Workers (OFWS) nga mangabot sa Mactan -Cebu International  Airport o MCIA.

Matud pa ni Chan nga gawas sa unom ka mga hotel  sa dakbayan duna pay laing duha pa ka mga hotels nagproseso sa ilang accreditation aron mahimong isolation facility.— IBM (BANATNEWS)