Tricycle drivers sa Mandaue nag-protesta

CEBU, Philippines — Nagprotesta ang mga tricycle driver sa Dakbayan sa Mandaue diha atubangan sa city hall niadtong miaging adlaw ug naghangyo nga ibalik na sila sa naandan nilang mga rota.                                   

Kini tungod kay suma pa sa mga driver nga ning minus na ang ilang kita ug daku kaayo og epekto sa ilang panginabuhian.                                 

Matud pa sa maong mga tricycle driver nga sukad sa pagpatuman nga anha na lamang sila kutob sa ilang biyahe sa mga eskinita  sa ilang barangay daw nagkagamay usab ang ilang kitaon tungod kay sagad  sa mga tawo dili man mosakay kay maglakaw na man lang paingon sa ilang panimalay.                               

Si  Ronilo Gahator nga maoy bise presidente sa Pinagkaisang Samahan ng Mga Tsuper  at Operator Nationwide  (PISTON) miingon nga sukad sa pag-usab sa ilang rota ang ilang kitaon igo na lamang sa  panggasolina nga anaa na lamang sa P50  ngadto sa P100  matag adlaw nilang pagpamasahero.

Sa nasayran si Mayor Jonas Cortes nimando na pagdakop sa mga drivers nga miabuso sa ilang pagpamasahero ilabi na kadtong wa motuman sa one-passenger-policy nga gitumong aron makalikay sa COVID-19 .

Namatikdan sa mayor nga pabilin usab nga gipangayo sa mga tricycle drivers ang taas nga pletihan bisan ug nikarga sila ug sobra sa usaka pasahero. Ubos sa one-passenger-policy gitugtan ang tricycle driver nga mosingil og P25 nga pletihan kun usa lang ka pasahero ang sakay niini kada byahe. — Romeo T. Limpangog‘/MEL

Pag-agi sa bukirang barangay sa Talisay bantayanan

Gipahimangnuan ang mga tawo nga mag agian sa bukirang barangay sa Dakbayan sa Talisay nga magmatngon gumikan sa hulga sa pagdahili sa yuta.

Kini human namatikdan ang ginagmay nga pagdahili sa yuta nga nasinate diha sa Barangay Manipis gumikan sa nagpadayon nga uwan nga maoy makapahumok sa yuta.

Hinoon Si Police Lt. Col. Gerard Ace Pelare, pangu sa Talisay City Police Station miingon nga kanunay nga naka-alerto ang iyang mga sakop ilabi na sa posibleng mga alarma sa landslide sa nahisgutang lugar.

Ang Manipis maoy karsada nga agi-anan paingon sa Dakbayan sa Toledo ug sagad usab moagi dinhi ang mga bikers.

“Ang mga bikers sila na gyud ang mo desisyon kung angay ba sila nga moagi sa lugar o dili ilabi na karong panahon nga kanunay nga nag-uwan”. Segun ni Pelare

Nasayran nga si Talisay City Mayor Gerald Anthony “Samsam” Gullas Jr. dali sab nga momando sa pagsira sa nahisgutang dapit sa higayon nga mahimong peligro na kining agi-an sa mga motorista. —MEL (BANATNEWS)