TPUJ Drivers pabayron og 10 posyento sa ilang pending violation

CEBU, Philippines — Giawhag sa buhatan sa Traffic Enforcement Agency of Mandaue (TEAM) ang mga driver ug operator sa mga traditional public utility jeepney (TPUJ)  nga nagbiyahe sa nagkadaiyang rota sa Dakbayan sa pagbayad og 10 porsiyento sa kantidad sa ilang balayranan sa mga pending nga traffic violation.          

Ang ilang pagbayad maoy usa sa basehan sa paghatag kanila og TEAM clearance certificate  nga gikinahanglan sa land Transportation Franchising and Regulatory  Board (LTFRB) ug Land Transportation Office (LTO) alang sa ilang kuhaon nga special permit  sa ilang pagbalik na og biyahe.                                                 

Si Edwin Jumao-as nga maoy bag-ong mi-asumer nga TEAM executive director miingon nga ilang nakab-ot ang maong hukom human ilang namatikdan nga mibuso ang pipila ka driver ug operator sa unang gikasabotan nga pagbayad pinaagi sa pagdatadata sulod sa unom lamang ka bulan.  Matud pa ni Jumao-as nga sa gipasiugdahan nga one-stop-shop niadtong Disyembre 11 ug 12, 2020, ang TEAM clearance lamang nga P100 ang gibayran ug ang pipila kanila mibayad og P500 isip pasiunang bayad sa linibo nga napundo nilang balayranan.                

Dugang pa ni Jumao-as nga sa iyang pag-asumer sa katungdanan mireklamo ngadto kaniya ang treasurer gumikan kay ang Provisional TEAM clearance nga P100 mao ra man ang gibayaran.                                    

 Si Jumao-as miingon sa gihapon ang driver moadto sa Emergency Operation Center (EOC) alang sa pagpaubos sa libre nga swab test ug moadto usab sa LTO 7 ug LTFRB 7 alang sa inspection nga pagahimoon sa ilang sakyanan. MEL (BANATNEWS)