Tri-cities wa nakatala og dugang nangamatay
CEBU, Philippines — Ang siyudad sa Mandaue, Lapu-Lapu ug Cebu City ingon man ang Cebu Province wala nakatala og mga bag-ong nangamatay tungod sa novel coronavirus disease (COVID)-2019 deaths niadtong Domingo base sa data nga gipagawas sa Department of Health Central Visayas.
Base sa datos sa DOH-7 ang total deaths sa dakbayan sa Sugbo, Mandaue, Lapu-Lapu ug Cebu Province nagpabiling anaa sa 661, 127, 82 ug 327. Makita sab sa datos sa DOH-7 nga ang Cebu City dunay 22 new cases ug tungod niini, ang siyudad aduna nay 9,742 total cases apan 385 niini lang ang active cases. Ang total recoveries naa na sa 8,696 human nga nadugangan kini og 28 new recoveries.
Sa data sab sa DOH-7 makita nga ang Mandaue City dunay 2,327 total cases sa COVID-19 diin 256 niini ang active cases ug wala’y natala nga dugang recoveries hinungdan nga nagpabilin sa 1,944 ang recoveries sa siyudad.
Ang siyudad sa Lapu-Lapu sab dunay 2,249 total cases sa COVID-19 diin 185 niini ang active cases ug duha ang nadugang nga bag-ong kaso.
Moabot sa 1,972 ang total recoveries sa siyudad human natala ang walo ka mga bag-ong recoveries sa dakbayan.
Sa datos niadtong Domingo sa DOH-7 ang Central Visayas dunay 19,772 total cases sa COVID-19; 1,549 niini ang active cases ug 17,006 ang total recoveries ug 1,217 ang total deaths.
Sa 64 ka bag-ong kaso sa coronavirus disease (COVID-19) ang nadugang sa listahan sa mga kaso lukop Central Visayas niadtong Septiyembre 13, ang ubang mga lugar nga dunay bag-ong kaso naglakip sa Lapu-Lapu City nga dunay duha; siyam (9) sa Mandaue, lima (5) sa Bohol ug 26 sa Probinsya sa Sugbo.
Samtang 69 usab ka recoveries ang natala niadtong adlawa kon diin 28 ang sa Cebu City, walo (8) sa Lapu-Lapu ug 33 sa Probinsya sa Sugbo. Ang recoveries karon sa Central Visayas anaa sa 17, 006 gikan 19, 772 nga cumulative case.
Samtang ang namatay naa sa 1, 217 sumala sa DOH-7. – Le Phyllis F. Antojado/IBM (BANATNEWS)
- Latest
