Border sa Bulacao pabiling sirado sulod sa usa ka semana

CEBU, Philippines — Dili pa gihapon yanong maagian ang karsada diha sa Natalio Bacalso sa Barangay Bulacao, Dakbayan sa Talisay kong mopaingon sa Dakbayan sa Sugbo.

Si Mayor Gerald Anthony “Samsam” Gullas Jr. nakighinabi ni Police Brigadier General Ignatius Ferro, direktor sa Police Regional Office (PRO)-7 labot sa pag-abli sa border samtang gipaubos na sa modified general community quarantine (MGCQ) ang Siyudad sa Sugbo ug ang tibuok Probinsiya sa Sugbo.

Apan si Ferro nipadayag kang Gullas nga pabilin lang una nila kining siradohan sulod sa usa ka semana.

Sa pagkakaron, ang gikan sa Siyudad sa Sugbo mahimo kining makasulod sa Dakbayan sa Talisay.

Hinuon inig lapas sa usa ka semana mahimo na nga makalapos-lapos ang mga sakyanan.

Giklaro usab ni Gullas nga kadto lang Authorized Person Outside Residence (APOR) ug frontliners ang makagawas sa ilang panimay tungod kay hugot gihapon nila nga gipatuman ang health protocols.

Magkinahanglan gihapon og quarantine pass ang mga tawo kong mogawas sa ilang pinuy-anan. /BDB (BANATNEWS)