Labella: Dugang QP niadtong Hunyo pa naprinta
CEBU, Philippines — Gihimakak ni Cebu City Mayor Edgardo Labella ang report nga giingong nanghatag ang kagamhanan sa Siyudad sa Sugbo og dugang quarantine pass ug giingong wala sila makig-alayon sa Police Regional Office (PRO)-7.
Matud ni Labella nga ang giingong dugang quarantine passes nga gi-distribute sa siyudad ngadto sa mga barangay passes kini nga giisyu sa siyudad nga naprinta niadtong buwan sa Hunyo niining tuiga.
“The additional quarantine passes were issued as early as June 1 to 15, 2020, there were I think 178,000 issued first base on the data, base of the Department of Health unya gipun-an ni og 75,000 with the coordination of the Philippine National Police”, pasabot ni Labella.
Kini maoy giklaro ni Labella human sa pag-apelar ni Police Brigadier General Albert Ignatius Ferro, direktor sa PRO-7 nga naghangyo sa opisyales sa siyudad nga makig-alayon kanunay kanila sa dili pa ipatuman ang mga bag-ong palisiya.
Giingong nakugang si Ferro kabahin sa nahisgutang taho sa giingong pagpanghatag sa kagamhanan sa Siyudad sa Sugbo og laing 1,500 quarantine passes sa matag barangay. Si Labella nipadayag sa maong katin-awan atol sa virtual presser niini kagahapon uban ni Environment Secretary Roy Cimatu, Overseer Task Force COVID Cebu ug General Mel Feliciano, Deputy Overseer Task Force COVID Cebu.
Sayo pa, bisan og ang Siyudad sa Sugbo gipaubos na sa General Community Quarantine apan sa gipagawas nga Executive Order No. 86 ni Labella gikinahanglan gihapon ang quarantine pass niadtong mga mogawas sa ilang panimalay.
Ug aduna gihapoy adlaw nga gitagana sa paggawas sa mga residente sa siyudad diin ang quarantine codes nga nagtapos sa odd number nga 1,3,5,7 ug 9 sa adlaw’ng Lunes, Miyerkules ug Biyernes mahimong makagawas.
Kadtong quarantine codes nga nagtapos sa even numbers nga 2,4,6,8 ug 0 makagawas sa adlaw nga Martes, Huwebes ug Sabado samtang sa adlaw’ng Dominggo walay tugotang makagawas o dili i-honor ang QP sa maong adlaw. /BDB (BANATNEWS)
- Latest
