Quarantine passes gisuspenso

CEBU, Philippines — Gisuspenso na sa Department of Interior and Local Government (DILG) ang tanang quarantine pass sa Dakbayan sa Sugbo sukad pa niadtong Martes sa 10 sa gabii .

Gibana-bana nga moabot ngadto sa 250,000 ka quarantine passes ang na isyuhan sa dakbayan.

Si Police Regional Office 7 Police Brigadier General Albert Ignatius Ferro atol sa gipahigayon nga meeting sa National Inter-Agency Task Force mibutyag nga mao kini ang rekomendasyong nakab-ot aron makontrolar ang gidaghanon sa mga tawo sa kadalanan.

Tungod niini tanang police station gimandoang estriktohon ang pagsusi sa mga tawo nga mangawas sa ilang mga barangay sugod karong adlawa.

Apan iyang gipasabot nga adunay himuon nga re-issuance sa quarantine pass diin usa lang sa usa pamilya ang hatagan aron magamit sa pagpalit sa panginahanglan ilabi na sa pagkaon ug medisina.

Makagawas ra

Apan mipasabot si Ferro nga mahimo ra nga makagawas ang mga authorized persons outside residents (APOR) sama sa mga frontliners, mga sakop sa media, delivery sa essential goods, mga kawani ug field workers sa power, telecmmunications, call center agents, mga otorisadong kawani sa gobiyerno ug kadtong mga kompanyang gitugotang padayon mo-operate.

Matapos ang hard lockdown sa tibuok dakbayan sa Sugbo kung libkason na ang enhanced community quarantine (ECQ).

Mahimo ra hinuon makagawas ang mga residente sa ilang balay aron makapalit apan diha lang sila sa ilang tagsa-tagsa ka barangay.

Si Cebu City Mayor Edgardo Labella  miingon nga gihimo kini sa IATF  human sila misuroy sa siyudad ug nakita nga daghan gihapong mga tawo ang nanggawas sa ilang panimalay bisan og ECQ ang siyudad.

Wa kapangandam

Apan tungod kay gabie na gipahibawo ang pagsuspenso sa quarantine passes daghan ang wala mahibawo niini hinungdan nga adunay mga tuyo sa silingang mga barangay ang nakurat kay wa na sila pasudla.

Sama sa sitwasyon kagahapon sa merkado sa Barangay T. Padilla kun diin dunay mga residente gikan sa silingang barangay nga  mamalit unta ang wala na pasudla.

Si Merlina Laraño, residente sa Barangay Parian ug anha tigpalitan og pagkaon sa merkado sa T. Padilla wala gyud makasulod sa lugar.

Wala gyud kapugngi ni Laraño ang paghilak sanglit nasagmuyo kini ilabi na nga mas makabarato sila og palit sa maong merkado karon nga nihit na kaayo ang kwarta ug wala kini nadawat nga ayuda gikan sa ilang barangay.

Samtang sa Barangay San Nicolas Proper naabtan sa Banat News ang mga tawo nga namalit sab sa ilang mga pangihanglanon sama sa bugas, utanon ug uban pa.

Si San Nicolas Proper Barangay Captain Clifford Niñal mihangyo sa mga konstituwente nga magpailob ug paabuton ang kamanduan sa siyudad.

“Kalma lang ta niya ato lang tumanon ang direktiba nga dili lang sa gyud ta mogawas-gawas kay para ni sa kaayuhan nato kay pananglitan dili ta mapatuo kapoy na kaayo og extend, pila na ka semana sige og extend tag 15 days kapoy na gyud kaayo sa tanan mao gihangyo nato ang kaigsuonan nga dili lang kaayo maggawas-gawas,” ni Niñal pa