Mga apektado sa COVID-19 gihatagan og hinabang

CEBU, Philippines — Mokabat sa 2 mil ka pamilya sa isla sa Dakbayan sa Lapu-Lapu ug Barangay San Nicolas Proper sa Dakbayan sa Sugbo ang nakadawat og mga hinabang gikan sa kagamhanan.

Matud ni Annabeth Cuizon, pangulo sa City Social Welfare and Services sa Dakbayan sa Lapu-lapu nga niapod-apod sila og food packs sa 551 ka panimalay sa Pangan-an, 184 sa Caohagan ug 603 sa Caubian.

Ang mga food packs naglangkub kini sa bugas, canned goods, ug noodles nga iapod-apod ngadto sa mga apektado sa problema sa covid-19 diin daghan ang nawagtangan sa ilang panginabuhian.

Mapasalamaton si Cuizon ngadto kang Mayor Junard “Ahong’ Chan sa dinalian nga pagpanghatag niini og ayuda ngadto sa mga nanginahanglan.

Gitug-an ni Cuizon nga diha sa Isla sa Olango tanang panimalay ang nahatagan sa maong food packs.

Samtang si Kapitan Clifford Jude Niñal uban sa iyang konseho sa Barangay San Nicolas Proper ang niapod-apod usab og hinabang ngadto sa mga pamilya nga sakop sa iyang barangay.

Gibutyag ni Niñal nga dul-an sa 1,000 ka pamilya ang ilang nahatagan og hinabang.

Ang opisyales sa maong barangay ang nidunol og hinabang sa matag balay aron ang mga residente magpundo na lang kini.

Gitug-an ni Niñal nga dul-an sa P50 mil ang nagamit nilang budget gikan sa panudlanan sa barangay ug aduna nay nidonar kanila ug bugas gikan sa mga magpapatigayon sa ilang barangay nga nitabang ug lakip usab ang iyang usa ka bulan nga sweldo niadtong buwan sa Pebrero iyang giapil sa pagpalit og mga bugas nga gipanghatag. /BDB (BANATNEWS)