Kapin 2,000 na nadugang sa botante sa siyudad

CEBU, Philippines – Hapsay ra ang dagan sa pagpangrehistro sa mga botante sa buhatana sa Commission on Elections sa Dakbayan sa Sugbo sukad sa pagsugod niini niadtong Agosto 1.

Kini sumala pa ni Cebu City North District Election Officer, Atty. Marchel Sarno.

Banabana ni Sarno nga sa north district niabot na og usa ka libo ang nakaparehistro samtang sa south district kapin na sab sa usa ka libo.

Bisan og holiday kagahapon gumikan sa ika-450 founding anniversary sa Lalawigan sa Sugbo, bukas gihapon ang buhatan sa Comelec ug padayon gihapon sila sa pagpanawat og mga molupyo sa Dakbayan sa Sugbo nga gustong magparehistro.

“Sa gikasulti na namo ang among opisina open Monday to Saturday including holidays, karon holiday ron apil ron. To give opportunity sa katong mga gatrabaho ba walay higayon sa pagparehistro mao nga atong gi-include ang Saturday para sa mga estudyante ug lakip na sa mga katong mga gatrabaho nga walay higayon sa pag-absent ang tuyo gyud ani daghan ang marehistro at least any result sa election will be inclusive everybody should participate sa atong election,” sigun ni Sarno.

Nasayran nga ang gidawat karon sa Comelec mao kadtong regular ug gustong magparehistro sa Sangguniang Kabataan diin ang qualification kinahanglan nga 15-anyos na sa May 2020 nga eleksyon.

Bisan og dunay hugon-hugon nga basin mauswag ang piniliay sunod tuig, si Sarno niawhag gihapon sa publiko nga magparehistro tungod kay dili lang kini alang sa barangay elections apan sa tibuok piniliay nga mahitabo sa nasud.

“Yes, awhagon gihapon nato sila tungod kay di man gud ni para lang sa 2020 elections, once marehistro ka karon forever naka marehistro so rehistro ka ug dili kaboto og two successive elections i-deactivate ang imong records but still rehistrado gihapon ka, akong balikon dili ni siya for 2020 nga elections for the whole elections katong narehistro dili na necessary magparehistro og usab og ma-postpone ang 2020 elections,” pasabot ni Sarno.

An registration magsugod sa alas 8 sa buntag hangtud sa alas 5 sa hapon ug molungtad kini hangtud sa Septiyembre 30, 2019. (/GMR)(BANAT NEWS)