Holiday karon sa tibuok Sugbo

CEBU, Philippines — Walay klase ug walay trabaho sa tibuok Lalawigan sa Sugbo karong adlawa subay sa pagsaulog sa ika-450 nga founding anniversary sa lalawigan.

Ang Agosto 6 gideklarar nga special non-working public holiday matag tuig sa tibuok Sugbo apil ang mga siyudad pinasikad sa Republic Act No. 8952 nga giapbrobahan niadtong Agosto 31, 2000.

Subay niini ubay-ubay nga mga kalihukan ang giandam sa Kapitolyo alang sa tibuok buwan sa Agosto.

Karong adlawa, atol sa adlaw sa anibersaryo, magsugod ang selebrasyon alas 7:30 pinaagi sa opening salvo, flag raising ug pagsaka sa bandila sa tanang lungsod ug dakbayan sa lalawigan sa Capitol ground nga pangulohan ni Gobernador Gwendolyn Garcia.

Motambong sa kalihukan si Davao City Mayor ug Presidential daughter Sara Duterte-Carpio.

Alas 8:30 sa buntag adunay ceremonial tree planting nga sundan sa agri-fair opening.

Alas 12 sa udto mao ang Fiesta sa Sugbo sa nagkadaiyang departamento ug opisina sa Kapitolyo ug alas 2 sa hapon mao ang misa sa Capitol Social Hall ug sa hapon nga kalihukan mao ang poso-making contest ug cooking demo. - Beverly I. Manla (BANAT NEWS)