Red mi-file og poll protest
CEBU, Philippines – Nisang-at og protesta ang kampo ni kanhi kongresista Ramon “Red” Durano VI sa House of Representatives Electoral Tribunal (HRET) batok ni Kongresista Vincent Franco “Duke” Frasco niadtong Hulyo 15.
Pinaagi sa iyang abogado nga si kanhi Commission on Elections (COMELEC) Commissioner Gregorio Larrazabal, ilang gihangyo ang HRET sa pag-ihap pagbalik sa mga balota sa niaging eleksyon sa mano-mano nga paagi ug ipabaliwala ang proklamasyon ni Frasco.
Apan si Frasco niingon nga ang protesta ni Durano nagpakita lang nga wala na siya uyoni sa katawhan sa ikalimang distrito human sa 70 ka tuig nga pagdominar sa pamilyang Durano.
Matud ni Frasco nga kini sab ang tumong nilang Presidente Rodrigo Duterte ug Davao City Mayor Sara Duterte nga siya ang gituboy sa niaging eleksyon alang sa kausaban sa distrito.
Gihangop ni Frasco ang protesta isip lain niyang higayon nga matataw ang iyang kadaugan sa dul-an sa 36,000 ka botos nga iyang labaw batok kang Durano.
Si Frasco nakakuha og 152,435 ka botos batok ni Durano kinsa nakakuha og 116, 826 ka botos.
Matud sa kampo ni Durano nga daghang iregularidad nga nabantayan sa niaging eleksyon nga nakapausab sa ihap sa mga botos sama sa nangaguba nga Vote Counting Machines (VCMs).
Gani ilang gisanglitanan ang pamahayag ni Presidente Duterte human sa eleksyon nga nagmando sa COMELEC nga ipabasura ang Smartmatic ug papangitaon og bag-ong kompaniya nga dili manikas.
“We took it as a marching order to substantiate this statement from the Honorable President with an actual case,” matud ni Barug Alang sa Kauswagan ug Demokrasya (BAKUD) Party chairman ug Danao City Mayor Ramon “Nito” Durano III.
Matud ni Nito Durano nga imposible kaayo ang kadaugan ni Frasco ilabi na nga daug sila sa siyam sa 11 ka lungsod samtang sa tibuok isla sa Camotes usa lang ka konsehal sa kampo ni Frasco ang nidaug. (Beverly I. Manla/GMR)(BANAT NEWS)
- Latest
