Mastermind pagpatay sa Haponesa nasikop

CEBU, Philippines — Bana sa negosyanteng Hapones nga gipatay dinhi sa Dakbayan sa Sugbo pipila ka buwan na ang nakalabay nadakpan sa mga otoridad didto sa Japan human kini maoy gitumbok nga mastermind sa pagpatay sa asawa.

Ang gidakop mao ang 77- anyos nga si Shinichi Hamada nga nagpuyo sa Nishi Ward sa Kobe, Japan. Siya maoy gitumbok sa mga otoridad nga nagsugo nga ipapatay ang iyang asawang si Junko Hamada.

Ang lalaking Hamada nadakpan sa mga otoridad didto sa Akashi City, Hyogo Prefecture niadtong Huwebes.

Sumala pa sa usa ka broadcasting company sa Japan, gipahibalo sa Hyogo Prefectural Police ang pagkasikop sa 77 anyos nga suspek kinsa dugay ng gipangita sa mga otoridad tungod sa pagpatay sa asawa niini dinhi sa Sugbo.

Nasayran nga si Junko ,71, gibanhigan patay didto sa dalan Natalio Bacalso Avenue niadtong Agosto 24, 2018 sa gitumbok nga mga mamumuno nga silang Mary Jane Aguilar; ug GB Bertulfo kinsa nangadakpan sa follow-up operations sa kapolisan.

Si Junko mao ang presidente sa BEAMS Philippines Export Corporation, usa ka exporter sa high quality nga mga  furniture ug home decorations nga nagbase sa Talisay City.

Sigun pa sa kaniadtong hepe sa Mambaling Police Station nga si Police Major Randy Caballes nga silang Aguilar ug Bertulfo miluwat og extrajudicial confession ang duha nga gisuholan ra sila ni Shinichi nga patyon ang asawa niini.

Matud pa nga giputol ni Junko ang paghatag og kwarta ngadto kang Shinichi human nadiskubrehan sa biktima nga may relasyon diay kini ug ang suspek nga si Aguilar.

Si Aguilar nag-angkas sa motorsiklo sa gunman nga si Bertulfo atol sa paghimo sa krimen. Siya maoy nagkompirmar kang Bertulfo sa target nga si Junko niadtong niadtong tungora nagmaneho sa iyang sakyanan padung sa Talisay City.

Ang hepe sa Investigation, Detection and Management Branch (IDMB) nga si Police Lieutenant Colonel Frankie Jingle Lugo nagkanayon bisan pa man og atoa sa Japan ang utok sa krimen, magpadayon gihapon diri sa Pilipinas ang husay sa kaso nilang Aguilar ug ni Bertulfo.

“Sa atin ‘yung dalawa, kasama siya (Shinichi) dapat kasi dito nangyari ng krimen, Wala namang power ‘yung court natin na i-summon siya kung hi-nold nila dun not unless kung sila mismo ang mag bo-volunteer na i-extradite nila dito for the hearing,” sigun ni Lugo.

Kahinumdoman nga mibisita sa Police Regional Office-7 ang mga polis gikan sa Japan niadtong buwan sa Pebrero karong tuiga aron mangaylap og ebidensya ug mga dokumento nga makatabang sa pag-case buildup batok sa nagpaluyo sa krimen.

Giingong mipasaka og buwag nga kasong murder ang mga Hapon batok kang Shinichi didto sa Japan.(/IBM)(BANATNEWS)