Barangay ug SK election gikatakda na sa mayo

CEBU, Philippines — Ang Commission on Elections (Comelec) mipagawas na sa schedule alang sa mga kalihukan sa umaabot nga Barangay ug Sangguniang Kabataan election karong umaabot buwan sa Mayo niining tuiga.

Sa Comelec Resolution No.  10246 nagsaysay nga sugod karong Abril 14 hangtud 21, 2018 mao ang election period.

Sa Abril 14 magsugod ang filing sa certificate of candidacy (COC) hangtud sa Abril 20, 2018. Ang Comelec nagkanayon nga sulod sa election period gidili ang pagdala og armas ug hinagiban.

Dili usab mamahimo ang paggamit og security personnel o bodyguards sa mga kandidato ug pagbalhin og opisyal sa gobiyerno.

Gidili usab ang suspension sa mga elective  provincial, city,  municipal ug barangay officer.

Gikan sa Mayo 4 ngadto sa 12, 2018 maoy gikatakda nga campaign period sa Comelec alang sa mga kandidato  kinsa buot magpapili sa piniliay sa Mayo 14, 2018.

Samtang inig ka Hunyo 13, 2018 maoy  uwahing adlaw sa pag-file og Statements of Election Contributions and Expenditures. (BDB) (BANAT)