Nadisgrasya may armas ug shabu

CEBU, Philippines - Usa ka 19-anyos nga naaksidente sa motor ang gidakop human nga nasakpan kining nagdala diay og armas ug mga pakete sa gidudahang shabu dihang  nangalagpot kini sa karsada diha sa Sitio Hagnum, Barangay Lusaran, ning dakbayan kagahapon.

Ang maong suspetsado giila nga si Jovyniel Banote Apalla, 19, residente sa maong dapit.  Matud pa sa hepe sa Talamban Police Station nga si Police Senior Insp. Arieza Otida nga pagtabang kang Apalla adunay nakita nga upat ka paketeng gidudahang shabu ug usa ka kalibre .45 pistola diha sa dalan duol kaniya.

Si Otida nagkanayon nga padulong na pauli ang suspetsado sakay sa iyang motorsiklo dihang nawagtangan kini og kontrol sa kakusog sa iyang pagpadagan hinungdan nga kini  natumba ug nagkatag sa dalan ang mga dala niini.

Nakaangkon og ginagmay’ng garas sa tuhod ug bukton ang maong suspetsado.

Gibutyag sa maong hepe nga gipaubos og probation ang maong batan-on kaniadto sa dihang 18 anyos pa tungod sa kaso sa paghupot og drug paraphernalia.

Wala man gihimakak sa suspetsado ang maong shabu ug matud pa nga walay lisensya ang maong pusil, si Otida miingon.

Samtang nadakpan ang usa ka Shantely   Lim Sanchez, 44,  nga gidudahang drug  pusher  diha sa Sitio  Kasadya, Barangay Poblacion, Lungsod sa Cordova ug nasakmit gikan niini ang unom ka paketeng shabu uban sa salapi nga gituohang halin sa drugas.

Pagrekisa sa gisambilay nga shoulder bag niini nakuha sa kapolisan ang  dugang  lima ka gagmay nga paketeng shabu ug P300 uban sa P200 nga marked  money.

Samtang  sa Consolacion Police Station, nadakpan nila ang usa ka Eduard Reryes Chepa, 27, diha sa District 5, Barangay Pulpogan human sa buy-bust operation ug nasakmit gikan kaniya ang unom ka paketeng shabu ug  P200 nga gituohang halin niini. (BANAT NEWS)