Gisulod sa balay gipatay

CEBU, Philippines - Usa ka lalaki ang gipauwanan og bala sa wala mailhing mamumuno diha mismo sa sud sa iyang panimay sa Sitio Bahadas, Barangay Tabunok, Dakbayan sa Talisay niadtong Sabado sa hapon.

Ang biktima mao si Wilbert Cabajar, 38, nga giingong sakop sa usa ka fraternity.

Matud pang PO3 Jason Del Campo sa Talisay City Police Station, nibutyag nga nanglimpyo sa ilang panimay ang biktima sa dihang nisulod ang duha ka wa mailhing mga lalaki.

Wala’y daghang estorya gipusil ang biktima nga naigo sa nagkadaiyang parte sa iyang lawas. Nisibat dayon ang mga mamumuno nga gibiyaan ang biktima nga naligo sa kaugalingong dugo.

Gidala kini sa Talisay City District Hospital apan gideklarar kini sa mga mananambal nga dead on arrival tungod sa kadaghan sa iyang samad pinusilan.

Nakuha sa kapolisan sa crime scene ang 10 ka basiyo sa bala sa kalibre .45 nga pistol ug tulo ka deformed slugs.

Nagtuo si Del Campo nga dako og kalagot ang mga mamumuno base sa kadaghan sa igo sa kalawasan sa biktima.

Sa pagkakaron dili pa makatug-an si Del Campo kun unsa gyud ang motibo sa pagpatay kaniya.

Samtang sa dakbayan sa Talisay, gipusil patay ang 38-anyos nga lalaki sulod sa ilang panimalay sa duha ka wa pa mailhing mga lalaki nga nagsakay og motorsiklo niadtong Sabado sa gabii.

Apan ang hepe sa Talisay Police Station nga si Supt. Emerson Dante nga nakahinabi sa Banat News niingon nga adunay dakong posibilidad nga nalambigit sa druga ang maong biktima.

Dugang pa niya nga palaaway ang maong biktima sa ilang mga silingan ug matud pa pasakitan pud niini ang kapuyo.

“Sinasaktan daw siya pagnaka-drugs at nakainom,” matud pa sa hepe. Sumala pa ni Dante, napriso na niadtong tuig 2013 ang biktima apan nakagawas na sa bilangguan. -/EIM (BANAT NEWS)