26M Muslim nikondenar sa ISIS

CEBU, Philippines - Gikondena sa 26 milyones ka Pilipinong Muslim ang gihimo sa teroristang Abu Sayyaf ug Maute didto sa Marawi City nga gikonsiderar nga nag-inusarang “Islamic City” sa nasud.

Si Ustadz Najib Rasul, tsirman sa Council of Elders of Metro Cebu Muslim Community sa interbyu sa DyRC Radyo Cebu kagahapon miingon gikondenar nila ang gibuhat sa mga terorista.

Matud pa niya, ang gibuhat sa maong mga bandido klaro kaayo nga pagsamok sa tanan, Kristiyano man o Muslim.

Siya nagkanayon nga wala sila magdahom nga ang Islamic City atakihon og mga tawong nangangkong mga maoy nagsubay sa tinud-anay nga Islam. Matud pa niya, sayop nga pagtulon-an bahin sa Islam ang ilang nakat-onan gikan sa mga nangangkong mga batid sa Koran kay ang gipangtudlo ang radikalismo, pagpatay, panaugdaog ug paghimo og kasamok.

Sumala pa niya wala’y bersikulo sa Koran nga nag-ingong malangit ang usa ka Muslim kun kini mopatay og Kristiyano o kadtong dili mga sumusunod sa Islam.

“Kaning mga indibidwal (terorista), ilang gi-reinterpret ang teachings, dili mga edukado nga tawo. Ang teachings sa Islam ilang gi-subject sa ilang away sa Amerika. Kami wala kauyon sa ilang gibuhat. Kung tarong pa sila nga mga tawo, nganong gisunog man nila ang Marawi? Mga Muslim man ang mga tawo diha, makita dinhi nga kaning mga terorista di ni sila moila bisan igsuon pa,” matud pang Rasul.

Gibasol ni Rasul kining mga tawong nagpatuong mga otoridad sila sa pagtudlo sa Islam apan ang tinuod gamay kaayo ilang kaalam niini maong ang ilang matudlo radikalismo ra.

Matud pa niya, aduna sila’y “fatwah” karon sa Lanao ug dinhi sa Sugbu nga nagmando sa tanang mga kalalakin-an kun makakita sila og mga terorista o tawong magtudlo og sayop nga pagtulon-an sa Islam ilang dakpon ug ipapriso.

Sa laing bahin, si Sr. Insp. Albert Quilotorio, deputy chief sa Talisay City Police nagkanayon nga gipahugtan usab nila ang seguridad sa dakbayan ug ilang aksyonan ang matag impormasyong ilang madawat.

Samtang sila si Talisay City Mayor Eduardo Gullas ug Naga City Mayor Kristine Vannessa Chiong nipadayag nga ang pag-atake sa mga Maute Group sa Marawi City usa ka mapintas nga buhat.

Ang duha miingon nga husto ang pagdeklarar ni Pres. Duterte og martial law sa Mindanao basta dili lang tamakan ang tawhanong katungod. - Gabriel Bonjoc ug Romeo Limpangog/EIM) (BANAT NEWS)