CEBU, Philippines - Miabot sa 17 ka tawo ang nasikop sa managlahing drug operations sa kapolisan sa Metro Cebu samtang 3 ang nakasibat.

Talisay City

Sa ikatulong higayon, nasikop ang 52-anyos nga tigpayuhot og ilegal nga drugas sa Sitio Rattan, Brgy. Tanke sa Siyudad sa Talisay niadtong Biyernes sa hapon.

Ang dinakpan mao si Loreto Padillo alyas Tatay Reto.

Matud ni PO3 Jason Del Campo sa Talisay City Police Station nga gihimo nila ang maong operasyon human nila nahibaw-an nga nakagawas na sab sa bilangguan ang suspek human makapiyansa.

Apan karon maglisod na og gawas sa prisohan si Padillo kay ang iyang kaso mao na man ang pagpamaligya ug wala kini piyansa.

Nasayran nga nakuhaan kini og 14 ka gagmay’ng pakete sa gidudahang shabu.

Gumikan sab sa siyagit sa usa ka spotter, nakaipsot ang tigpayuhot og ilegal nga drugas sa Sitio Tunga sa samang barangay.

Gihimo ang operasyon human nilutaw ang pangan ni Steward Padillo alyas Pangu. Nakigsabot na unta ang ilang target sa ilang poseur buyer apan nabulabog kini human ang spotter sa suspek, nakamatikod nga polis ang gikasabot niini hinungdan nga nakadagan.

Suway pang gigukod sa mga otoridad ang subject apan pakyas sila sa pagdakop niini.

Nadakpan hinoon nila nga naghupot gihapon og ginadiling drugas atol sa operasyon silang Edna Añabieza ug Jeffrey Gasalatan. Silang duha pulos nakuhaan og tag 10 ka gagmay’ng pakete sa gidudahang shabu.

Minglanilla

Sa gihimong Oplan Double Barrel Reloaded sa kapolisan sa Lungsod sa Minglanilla sa may Sitio Tabay sa Brgy. Calajoan, naaktohan nila nga nagsuyop og shabu niadtong Biyernes silang Rudelio Sumarago ug Noel Ybarita sa sulod sa usa ka barong-barong sa nahisgutang dapit.

Nasakmit gikan sa mga dinakpan ang usa ka putos sa gituohang shabu ug kagamitan sa pagsuyop niini.

Lapu-Lapu City

Sa Barangay Ibo sa Dakbayan sa Lapu-Lapu nasikop ang 33-anyos nga si Rolly Pantoñal sa gihimong buy-bust operation sa Sitio Commonwealth niadtong miaging gabii. Nasikop ang suspek human makadawat og tawag gikan sa concerned citizen ang kapolisan.

Nakuha gikan kaniya ang 3.5 gramos sa gituohang shabu nga mobalor og kapin sa P40 mil ug mga drug paraphernalia.

Cebu City

Sa Dakbayan sa Sugbo, walo ka tawo ang naaktuhang migamit og ginadiling druga sa managlahing barangay.

Nasikop silang Ricky Aro, Mario Aragon, Dario Sumalinog ug Joselito Lopez sa may dalan Belgium sa Brgy. Suba kagahapon sa kadlawon. Nakuhaan sila og upat ka gagmay’ng pakete sa gituohang shabu ug mga drug paraphernalia.

Nadakpan sab silang Francisco Laput, Jerome Gader, Reneviv Lawas, ug Joel Aliviado sa Brgy. Kamputhaw niadtong Biyernes sa gabii. Nakuha gikan kanila ang usa ka medium size nga gidudahang shabu ug mga gamit sa pagsuyop.

Consolacion

Nakasibat sa managlahing buy- bust operation ang duha ka gikatahapang drug pusher sa Brgy Tilhaong sa Lungsod sa  Consolacion pasado alas 11 sa miaging gabii.

Ang mga nakasibat giila nga sila si Bernard Villamor ug Rogelio Guardario.

Pulos nakamatikod ang duha nga polis ang ilang ka-transaksiyon hinungdan nga mikaratil sila og dagan ug wala na maapsi sa kapolisan.

Sa balay ni Guardario, nasigpatan sa kapolisan silang Emmanuel Borres ug Jaymar Casas nga nanuyop hinungdan nga sila maoy nasikop. Nasakmit gikan kanila ang duha ka gagmay’ng pakete sa gituohang shabu ug mga drug paraphernalia.

Nasayran nga suway sab nga gilabay ni Casas ang iyang dalang kalibre 22 nga pistola nga puno sa mga bala apan nakit-an kini sa kapolisan.

Liloan

Nadakpan sab sa buy-bust sa Liloan Police niadtong Biyernes sa gabii si Roel Suson uban sa iyang kapuyo nga si Quennie Mantos sa Brgy San Vicente. Nakuhaan sila og pito ka gagmay’ng pakete sa gituohang shabu nga mobalor og kapin sa P5 mil. - Hazel A. Secop, Rhena Pizarra, CNU Interns, Romeo T. Limpangog Gabriel C. Bonjoc, ug Rowena D. Capistrano/DILT) (BANAT NEWS)