Newscoop Assembly sa Sabado
CEBU, Philippines - Ipahigayon karong Sabado, Abril 8, ang ika-20 nga General Assembly sa Cebu News Workers Multipurpose Cooperative (Newscoop) sa Marcelo B. Fernan Press Center sa Sudlon, Lahug, Cebu City.
Kini sugdan sa Santos nga Misa sa alas 8:30 sa buntag nga dumalahon ni Fr. Roberto Ebisa, ang pangulo sa Kapisanan ng mga Brodkaster sa Pilipinas (KBP) Cebu chapter ug sundan sa programa diin si Presidential Assistant for the Visayas Secretary Michael Dino ang guest speaker.
Ang Newscoop aduna nay kinatibuk-ang katigayunan balor og P37.904 milyones kutob niadtong Disyembre 31, 2016 diin ang target nga P37 milyones nisobra og P904,000 samtang kapin na sa 1,500 ang tanan sakop.
Matud sa chairman sa Newscoop, Elias Baquero, nga kini ang labing taas sukad namugna ang kooperatiba niadtong 1996.
Ang Newscoop naghatag og burial assistance nga P30,000 sa mamatay nga sakop ug P15,000 sa dependents. Kadtong mabiktima sa kalamidad sama sa sunog, linog, bagyo ang makadawat sab og P3,000 nga hinabang.
Ang ma-hospital hatagan sab og P5,000 nga ihatud gyud ngadto sa tambalanan.
Magpahuwam sab ang Newscoop og puhunan sa mga sakop nga magnegosyo. (BANAT NEWS)
- Latest