2 gipatay sa ‘Sabog’

CEBU, Philippines - Patay ang duha ka mga babaye lakip na ang tulo ka bulan nga mabdos human sila gidunggab sa usa ka lalaki nga miangkong sabog sa drugas diha sa usa ka beach resort sa San Juan, Siquijor sa nakalabay nga gabii. Ang mga biktima mao sila si Nikki Pinero, 21, mabdos, taga Makati City ug Loreen Ramirez, 17, taga Dakbayan sa Dumaguete.

Samtang ang suspetsado mao si Michael Manayon, 34, taga Dakbayan sa Lapu-Lapu, Cebu. Ang tulo pulos mga turista sa lugar. Ang hepe sa San Juan Police, Chief Insp. Joseph Berondo nahinabi sa Banat News miingon nga ang tulo gustong mosaksi sa tinuig nga “longboard competition” diha sa ilang lungsod.

Nahitabo ang krimen sud sa balay sa tag-iya sa Bruce Beach Resort diin ang mga biktima ug ubang guest nagtapok. Matud pa kalit misulod sa kusina ang suspetsado kay miinom og tubig apan mibalik ug nagdala na og kutsilyo ug kalit nanunggab.

Naglumba og panagan ang mga tawo apan ang duha nga nabilin maoy giayo og dunggab sa suspetsado. Patay diha-diha dayon si Pinero samtang nadala pa sa Siquijor District Hospital si Ramirez apan nakabsan gihapon kini sa kinabuhi. Wala mosukol ang suspek atol sa pagdakop apan sa sulod sa prisohan nag-wild ug misulay kini paghikog gamit ang iyang sinina. Gitug-an ni Berondo nga miangkon kanila ang suspetsado nga nakagamit kini og drugas nga gitawag og “LSD party drugs” nga gihatag sa iyang nakaila nga taga Manila.

Matud ni Berondo nangangkon ang suspek nga nahimo niya ang krimen human gi-setup sa naghatag kaniya sa drugas kay gikuhaan siya niini og video dihang iyang giyarok ang drugas ug gibaharan nga ipagawas niini ang maong video sa internet.

Gisubay pa sa mga polis kung unsa ka tinuod ang pangangkon sa suspek bahin sa party drugs ug kun kinsa ang naghatag niini.

Nakuha usab sa mga polis ang tunga sa kilong pinaugang marijuana nga gitug-an sa suspek nga iyang dala diha sa iyang bag ug motorsiklo.

Nagduda si Berondo nga ibaligya sa suspek ang maong mga drugas diha sa ilang lungsod.

Gumikan sa maong hitabo nasabotan nila sa mayor nga kanselahon ang unta live-band concert karong gabii hasta na ang “long board competition” nga karong adlawa na unta mahuman.

 “Naamong intawon ang activity namo diri agi anang hitaboa, kining Siquijor very peaceful kaayo ni nga lugar unya kanang mga involved pulos dayo ra diri,” dugang pa ni Berondo.

Ang suspetsado miingon nga apil kini sa skate board competition apan wala lang kini naapil sa master list apan ang mga organizers sa maong kalihokan mitug-an ni Berondo nga dili contestant si Manayon. (BANAT NEWS)