Earthquake drill himuon karon

CEBU, Philippines - Mipahimangno ang Provincial Disaster Risk Reduction and Management Office (PDRRMO) ngadto sa mga tawo nga adunay katuyoan sa Kapitolyo karong adlawa nga maapektohan ang transaksyon sa mga buhatan  sa Kapitolyo nunot sa ipahigayon nga earthquake drill karong adlawa.

Ang probinsya sa Sugbo moapil kini sa labing unang Quarter Nationwide Simultaneous Earthquake subay sa tinguha sa National Disaster Risk Reduction and Management Council nga mahatagan og kaalam ang publiko sa kun unsay angay buhaton panahon kun adunay linog.

Matud ni Rhafael Luche ang pangulo sa Emergency Rescue Division  sa PDRRMO nga alas 9 sa buntag magsugod ang maong drill pinaagi sa ceremonial nga “Push Button” nga maoy signal nga magsugod na ang drill.

Tambongan kini sa mga opisyal sa kaulohan sama sa Secretary of National Defense, Office of the Civil Defense (OCD) ug Phivolcs.

Wala si Gob. Hilario Davide III ug Bise Gob. Agnes Magpale tungod kay aduna silay mga opisyal nga lakaw didto sa kaulohan.

Siya nagkanayon nga sa maong drill makita ang mga scenario sama sa mass casualty incident nga maglambigit sa 35 ka casualties, High Angle Rescue, Collapse Structure Rescue, Fire Suppression, Vehicle Extraction and Air Evacuation.

Ang SRP, Vicente Sotto Memorial Medical Center (VSMMC), Cebu City Medical Center (CCMC) ug ang AFP Central Command Headquarters moapil usab niini.

Giawhag ang tanang LGUs, mga kawani nga seryusohon kini. (BANAT NEWS)