Bag-ong rota sa PUJ sa Mandaue gipatuman

CEBU, Philippines - Nakasinati karon og kausaban ang rota sa mga public utility jeepneys (PUJ) nga moagi sa Dakbayan sa Mandaue nunot sa pagpatuman sa ordinansa alang niini.

Si Glenn Antigua, operations chief sa Traffic Enforcement Agency of Mandaue, niingon nga ang mga PUJ gikan sa Consolacion subay sa dalan M.C. Briones moliko na sa wala sa A.S. Fortuna extension dayon sa dalan A. del Rosario lahos sa merkado ug sa naandan nilang destinasyon.

Ang ubang PUJ gikan sa M.C. Briones adto kini liko sa tuo sa eskina sa A.S. Fortuna lahos sa JCenter Mall ug balik sa rota paingon sa Consolacion.

Gipasabot ni Antigua nga dugay na giaprobahan ang ordinansa nga gitumong alang sa paghapsay sa dagan sa mga sakyanan sa dakbayan apan nalangan kini sa pagpatuman tungod sab sa road concreting nga gihimo sa Department of Public Works and Highways.

Si Antigua niingon nga ang maong ordinansa walay kalainan sa gipatuman usab nga anti-jaywalking ordinance nga dugay na nga giaprobahan apan karon lang tuiga hingpit nga gipatuman. (BANAT NEWS)