Nibisita sa jail nalahos kapriso
CEBU, Philippines - Gisikop ang usa ka ginang kinsa nisuway sa pagpalusot sa drug paraphernalia sulod sa Talisay City Jail sa Barangay Maghaway niadtong Miyerkules sa hapon.
Ang dinakpan mao si Mona Labrador, 41, taga Barangay Dumlog sa nahisgutang siyudad.
Si Chief Insp. Josephus Jelianggao, warden sa TCJ, niingon nga mobisita unta si Labrador sa iyang higala nga si Steve Go nga aduna’y kasong robbery with homicide.
Apan dihang siya girekisa ni JO1 Geraldine Calum, nakuhaan siya og duha ka cellphones, tulo ka sim card, power bank ingon man walo ka tin foil nga pinutol na ug tissue.
Nagduda si Jelianggao hinungdan nga dali nga nipahigayon og greyhound operation apan wala silay nakuhang drugas sulod sa mga cottages sa piniriso. Samtang si Labrador nitug-an nga dili iya ang mga tin foil ug nibutyag nga basin gibutang lang sa iyang katapad sa jeep ang mga drug paraphernalia nga nakuha.
Asoy pa niya nga iyang bisitahon si Go aron ipaabot ang iyang pasalamat sa gihatag niini nga pinaskuhan.
Dugang ni Jelianggao nga kun pananglitan mahibaw-an nila nga aduna gyuy panagsabot ang binilanggo ug ang dalaw hayan duna gyud kini laing silot nga ipahamtang.
Kagahapon gidala na sa buhatan sa piskaliya si Labrador ug gipasakaan na og kaso. (BANAT NEWS)
- Latest
