“Mona Lisa” ni Mar Vidal
Junas Dungog Flores (Banat) - January 30, 2017 - 12:00am

CEBU, Philippines - Kitang mga Sugbuanon adunahan gyud sa bisan unsa nga talento. Uban kanato ilado gyud nga maayong mokanta, moarte, ug uban kay sikat sab sa pagguhit ug pag-painting sama sa award-winning nga Cebuano artist nga si Mariano "Mar" Baltazar Vidal.

Ang 62 anyos nga pintor, lumolupyo sa Sangi, Lapu-Lapu City, nigradwar sa kursong Fine Arts sa University of the Philippines. Adunay duha ka anak si Mar sa asawang si Gwendolyn Manching, usa ka Certified Public Accountant.

Ika-lima si Mar sa siyam nga managsuon ug bata pa lang  hilig na gyud siya mag-drawing. Singko anyos pa lang moguhit na siya og mga hulagway sa mga sinehan ug mantalaan. Sigun pa niya nga mutan-aw gyud siya og sine unya memoryahon niya ang mga hulagway sa maong pelikula dayon iyang iguhit.

Giangkon ni Mar nga kaliwat gyud nila ang mga artists ug gani ang mga uyoan niini kay mga pintor usab. Gipakatawo gyud si Mar sa Opon apan nabalhin sila sa eskwater sa Junquera human gipalit ang ilang luna sa gobiyerno aron himoon og airport.

Nagtungha si Mar sa Zapatera Elementary School diin dinhi unang nakita iyang talento sa pag-drawing. Sa Grade 1 pa siya, wala niya damha nga gilista diay siya sa iyang kauban aron sa pag-apil og drawing contest. Nakugang na lang siya nga gitawag sa maestra iyahang pangalan nga mamahimong representante sa nahisgotang kompetisyon.

Kay kabus man si Mar, nagtampohay ang mga kauban niini sa klase para sa iyang materyales nga gamiton. Nalangkat niya ang 1st prize sa gipahigayon nga inter-school drawing competition. Niabot gyud sa Manila si Mar ug inapil og Arts competition ug dili gyud mapakyas ang iyang mga kauban ug ang tunghaan kay makadaug gyud kini.

Gipaambit ni Mar nga ang iyahang maestra sa Grade 1 nga si Romula Savellon maoy naghatag niya og special class para sa fine arts matag hapon. Nakat-on siya og guhit og nude photos isip pagkat-on sa basic sa fine arts nga kat-onan ang human anatomy.  Didto nabaid og maayo ang talento ni Mar. Dili niya makalimtan matud pa ang hagdanan sa Zapatera diin ngadto siya tauran og medalya human sa flag ceremony matag daug niya sa kompetisyon.

Gibutyag ni Mar nga dakong supak ang iyahang amahan sa pag-drawing kay matod pa wala siya’y kaugmaon niini. Giangkon niya nga kun masakpan siya sa iyahang amahan nga mag-drawing kay balion ang lapis niini.

"Ang akong buhaton kay adto ko’s kisame, magdala ko og flashlight ug adto mag-drawing aron dili ko makit-an ni papa,"paambit pa niini sa Banat News Tingusbwan.

Giangkon gyud niya nga nakahuna-huna siya kaniadto nga tinuod ang gisulti sa iyahang amahan nga walay kwarta sa pag-drawing.

"Tinuod gyud na sa una nga wala gyu’y kwarta ang artist , hatagan ra ka og snacks sa magpa-drawing ug kun bayran ko kay akong tigumon para palit og art materials," niya pa. Giasoy ni Mar nga nakatabang ngadto sa iyahang inahan ang pag-drawing kaniadto. Adunay higayon nga siya ang nagbayad sa matrikula sa iyahang maguwang nga nagtungha sa kolehiyo. Sa high school pa lang kay aduna na siyay bank account diin didto niya isulod iyahang ginagmay nga halin sa pag-drawing. Nahibong iyang amahan nganong aduna siya’y in-adto kadako nga kwarta ug didto nasuta niini nga halin diay kadto sa iyahang pag-drawing.

"Dili ko makalimot nga iya kong gihatagn og yellow nga brush nga gamay as acceptance. Lipay kaayo ko ug mura ko’g naas langit. Human adto kay sa among sala nako mag-drawing," paglab-as pa niya.

Misteryo ni Mona Lisa

Giasoy ni Mar nga kaniadto wala gyud na siya nakaila og painting ni Mona Lisa apan sige na siya og damgo sa hulagway niini.

"Ang iyang sulti nako sa akong damgo Kay -- Mar,i-paint ko kay tabangan tika. Mura gyud og tinuod. Nangutana ko nga kinsa man ning bayhana, nag-itom,abi nako’g kalag," butyag pa ni Mar.

Hangtod nga nakahuwam kini og libro nga adunay hulagway ni Mona Lisa ug dayon iya kining gi-paint.

Giapil niya sa usa ka exhibit ang painting ni Mona Liza ug didto nauyonan ni Josephine Ruiz kinsa tag-iya sa Mactan Electric Company. Nihangyo si Mrs. Ruiz nga paliton ang maong painting apan wala gyud niya gibaligya bisag giadto na siya sa ilaha.

"Wala nako gibaligya kay ako mura ko’g nabuang sa paintings. Dili nako mokaon ug sige nako’g panira sa kwarto. Mabusog raman ko’g tinana-aw pud," matud pa ni Mar.

Apan napugos gyud siya sa pagbaligya niini bisag sakit sa iyang buot human nanginahanglan og kwarta iyahang inahan sa paglukat sa giprendang makina sa panahi niini. Nakahinumdom siya sa iyang damgo nga miingon si Mona Lisa nga tabangan siya niini.

Pagtungha sa Kolehiyo

Pag-gradwar ni Mar sa high school kay nakadawat kini og scholarship gikan sa Universirty of Southern Philippines apan nibalhin sa University of the Philippines human naagni sa sikat nga pintor sa Sugbu nga si Martino Abellana ug mga kaubanan. Gigastohan si Mar ni Mrs. Ruiz kinsa nakapalit sa iyahang Mona Lisa nga painting.

"Duna koy friend nagkita me karon. Niana nga grabeha daw kaayo ko sauna, makit-an ra ko niya maglakaw padung UP, pero karon wala ko nagdahom nga may Mercedes Benz naka," sigun pa ni Mar.

Nakatigom gyud og kwarta si Mar gikan sa halin niini sa paintings hangtod nga nakapalit siya og yuta ug balay sa Opon ug dinhi na sila nagpuyo human nasunog ilang balay sa Junquera.

Human nigradawar sa UP, gikuha siyang magtudtudlo sa maong tunghaan ug niabot gyud og pito ka tuig nga nagtudlo. Lakip sa iyang mga art students mao silang  Monique Lluillier ug Kenneth Cobonpue.

Usa sa grabeng krises nga iyang naagian mao ang pagkasakit sa iyahang asawa og lopus niadtong 1999. Mapasalamaton si Mar sa gihatag nga talento sa Ginoo ngadto kaniya gumikan kay ang pag-painting ra gyud ang nakaabag sa liboan nga bayronon sa ospital matag adlaw. Giisip ni Mar nga signature sa iyahang paintings mao ang paggamit niya og color. "Ang akoa kay sa colors nako. It's a combination between cool and warm color. Maong makakita sila sa akong paintings kay makaingon sila nga kang Vidal ni, tungod sa color," hulagway pa niya.

Pasidungog

Nakadawat og daghang pasidungog si Mar sa nagkalain-laing award-giving body lakip na niini mao ang "Artist of the year" sa Abellana National School, Mactan's Best Artist gikan sa Waterfront Hotel ug Most Outstanding Award gikan sa University of the Philippines.

Niabot na sab sa laing nasud ang iyahang mga painting sama sa iyang artwork nga San Pedro Calungsod nga tua karon sa Vatican ug painting niya nga gipalit ni Rockefeller sa New York. Lakip sa sikat nga celebrities nga iyahang nabaligyaan og paintings mao sila si Senator Manny Pacquiao ug Jacklyn Jose.

Nailhan si Mar dinhi sa Sugbu nga moguhit og nude. Angkon pa niya nga 12-anyos pa lang siya nagsugod na siya og drawing og nude. Mapasigarbuhon siya nga wala gyud nahitabo nga adunay reklamo kaniya iyahang mga kliyente.

Tambag niya ngadto sa buot mamahimong artist mao ang pagpaduol ngadto sa Ginoo kinsa giisip niya nga tuburan sa atong talento.

"Put God first before you do things. Dili ko mo-paint kung dili ko mananghid niya daan. We are just instrument and He is really the artist," panapos pa niya. (BANAT NEWS)

MONA LISA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with