Civil service application sa SM, Robinsons

CEBU, Philippines – Pwede na moadto sa mga malls ang gustong mokuha og career service examination aron pagproseso sa ilang application.

Ang Civil Service Commission nipahibawo nga mopahigayon sila og lima ka adlaw nga application processing sugod karong adlawa sa SM City Cebu ug Robinsons-Fuente alang sa eksaminasyon nga gikatakda karong Marso 12.

Si Lorda Villaflor, ang chief personnel specialist sa Examination Services Division sa CSC-7, nidason nga ang maong kalihukan magsugod sa Enero 16 hangtud sa Enero 20.

Siya niingon nga ang CSC-7 personnel anaa sa Robinsons-Fuente nga modawat og aplikante sugod sa alas 10 sa buntag hangtud sa alas 5 sa gabii samtang ang Government Service Express Area sa SM City Cebu ablihan alang sa maong kalihukan sugod sa alas 10 sa buntag hangtud sa alas 7 sa gabii.

Ang aplikante dili na kinahanglang moadto sa buhatan sa CSC-7 sa Sudlon, Lahug, Cebu City.

Si Villaflor nagkanayon nga ang maong lakang nakab-ot tungod kay gusto sa maong ahensya nga makahatag og serbisyo nga sayon alang sa tanan.

Matud niya nga ang application form pwedeng ma-download sa CSC official website: www.csc.gov.ph ug pwede usab makakuha sa maong form sa mga malls sa oras nga sila mag-process.

Uban sa filled up nga application form kinahanglan sab magdala og upat ka I.D. pictures; handwritten name tag; ug original ug photocopy sa bisan unsang valid I.D. ug P500 nga examination fee. Ang maong eksaminasyon abli para sa professional ug sub-professional level examinations diin ang nauna pwedeng makakuha og officer ug technical positions samtang ang naulahi pwedeng makakuha og non-technical ug clerical positions.

Aron ang usa ka tawo makabaton og permanente nga posisyon, kinahanglan siyang mopasar sa eksaminasyon tungod kay kini pre-requisite sa regularization sa civil service.

Ang kawani sa gobiyerno nga walay civil service eligibility kutob ra sa contractual. -/GMR (BANAT NEWS)