‘Night market’ sa Colon daghang kausaban

CEBU, Philippines - Daghan kausaban ang ipatuman sa night market sa dalan Colon aron malikayan ang kurapsiyon nga maoy tinguha ni Cebu City Mayor Tomas Osmeña.

Gitug-an sa pangulo sa Division for the Welfare of the Urban Poor (DWUP), Genevieve Alcoseba, nga ang tanang interesado sa night market ilang gidawat diin niabot sa kapin usa ka libo ang ilang napaubos sa interview niadtong Agosto tungod kay wala na man kini bayad.

Human sa interview, naa na sila karon sa validation stage diin duna silay gipa-fill-up nga family profile tungod kay gusto ni Osmeña nga mabahin ug mahatagan ang tanan og higayon nga makapanginabuhi.

Karong Nobiyembre 8 mopagawas ang DWUP og lista niadtong mga interesado sa night market ug ipapilit lang kini gawas sa City Hall aron dali makit-an ug dili maghuot.

Human niini, ang DWUP mohatag og higayon sa tanan aron matubag ang mga pangutana ilabi na kadtong mga wala maapil sa lista gikan sa Nobiyembre 8 hangtud sa petsa 11 sa maong buwan.

Sa Nobiyembre 14 mao na ang pagpagawas nila sa final listing kung kinsa gyud ang beneficiaries sa night market ug wala nay mga kausaban nga himoon.

Nasayran nga Nobiyembre 18 ang target date nga opisyal nga sugdan ang night market sa dalan Colon sanglit ang ilang gibuhat karon dry run pa aron mahibaw-an kun dunay mga kausaban ug unsay mga problema nga angay korehian. Gipasabot ni Alcoseba nga usa sa direktiba nila ni Osmeña nga dili i-award sa grupo ang night market kay matud pa diha mosulod ang pagpangwarta gani wala may gitugutan nga mokakolekta og kwarta gawas lang sa arkabala nga bayaran.

Nasabutan nga P100 ang bayad sa matag tulda matag gabii apan tungod sa kadaghan sa mga aplikante ug naa  ra kapin 200 ang mahimong ibutang nga tulda, ang gibuhat mao nga sa usa ka tent tulo ka beneficiaries ug sila na ang magsabot.

Sa bayad nga P100 matag tulda, diha kuhaon ang bayad alang sa marshal, kuryente, cleaners ug uban pang bayronon ug gipasalig ni Alcoseba ang tanan himoan gyud og liquidation. Gihulagway ni Alcoseba nga sa nilabay nga administrasyon minilyon ang nisulod nga kwarta sa night market apan giingong wala’y nasulod sa panudlanan sa sa kagamhanan sa siyudad.

Gipasabot sa DWUP nga bisan og moagi og makuting proseso ang tanan wala kini  problema nila kung kini ang mahimong pamaagi aron mawala ang kurakot ug pagpangwarta sa night market. Aron mahibaw-an gyud kung dunay anomaliya, lahi-lahi ang tawo nga mo-monitor gikan sa DWUP, PROBE ug Market. (BANAT NEWS)