Dumpit gustong mobalik sa SWAT

CEBU, Philippines - Gusto sa kontrobersiyal nga polis nga si SPO1 Adonis Dumpit nga mobalik sa iyang naandang unit, kini mao ang Special Weapons and Tactics diha sa Cebu City Police Office.

Matud niya andam siyang mohimo sa iyang trabaho ilabina sa kampanya batok drugas bisan og tulo na lang ka tuig ang nahibilin sa iyang pagpanerbisyo ayha kini pwedeng makaretiro.

Si Dumpit miingon nga bisan pa sa mga nahitabo kaniya usa gihapon siya ka polis ug andam motuman sa kamanduan sa Philippine National Police. Apan kung siya ang papilion mas ganahan si Dumpit nga mabalik sa SWAT. Si Dumpit  nabalik sa CCPO niadtong adlaw nga Lunes human gipirmahan ni Police Regional Office-7 Director Noli Taliño ang pagbalhin kaniya gikan sa Bohol Provincial Police Office.

Gitug-an sab niya nga nagpuyo siya karon sa balay ni Mayor Tomas Osmeña kay wala man kini balay nga kapuy-an dinhi sa dakbayan. Mosugot usab siyang mabalik nga security detail sa mayor  kun siya mandoan.

Si Dumpit nakombikto sa pagpusil patay sa usa ka batan-ong gipasanginlang tulisan, apan nakaapelar kini ug nahatagan og kahigayonan nga makapiyansa hinungdan nga kini nakabalik sa serbisyo. (BANAT NEWS)