Kalidad sa hangin dili mayo alang sa sensitibo nga mga grupo
CEBU, Philippines — Nagpabiling “dili maayo alang sa sensitibo nga mga grupo” ang kalidad sa hangin sa Metro Cebu niadtong Domingo sa buntag samtang padayon nga gimonitor sa Environmental Management Bureau Region VII (EMB-7) ang haze nga nakaapekto sa pipila ka bahin sa rehiyon.
Alas-11 sa buntag kagahapon, Septiyembre 6, nakatala ang Metro Cebu monitoring station og Air Quality Index (AQI) nga 127, nga giklasipikar nga “unhealthy for sensitive groups.”
Kini nga klasipikasyon nagpasabot nga ang mga tawo nga sensitibo sa polusyon sa hangin mahimong makasinati og epekto sa ilang panglawas ug girekomendar nga mag-amping, ilabina kung dugay nga magpabilin sa gawas.
Samtang, maayo ang kalidad sa hangin sa Barangay Cabitoonan, Toledo City, diin nagtala og AQI nga 46 sa samang oras.
Ang haze nga nakaapekto sa Metro Cebu nalambigit sa aso gikan sa mga sunog sa kalasangan ug yuta sa Kalimantan, Indonesia.
Matud sa EMB-7, padayon nilang gimonitor ang kalidad sa hangin aron masuta ang presensya, gilapdon ug posibleng epekto sa haze sa panglawas sa publiko.
Gidasig sa EMB-7 ang publiko nga magpabiling updated ug kanunay nga susihon ang opisyal nga mga update ug air quality advisories sa EMB-7. — /MEL (BANAT NEWS)
- Latest
