Kaso sa mayor sa Dalaguete gibasura

CEBU, Philippines - Gibasura sa Sandiganbayan First Division ang kasong Anti-Graft and Corrupt Practices Act batok kang Dalaguete Mayor Ronald Allan Cesante kay nalapas ang katungod sa mayor sa pagpadali sa disposition sa kaso.

Sa order ni Associate Justice, Reynaldo Cruz gilibkas usab ang hold-departure order batok kang Cesante ug nimando kini sa pagpauli sa cash bond nga gibayad ni Cesante alang sa iyang temporaryong kagawasan.

Ang Sandiganbayan nikonsidera sa Motion to Quash Amended Information nga giduso ni Cesante.

Si Efren De la Cruz, chairperson/Associate Justice ug Associate Justice Michael Frederick Musngi ni-concur usab sa maong order nga giluwatan niadtong Septiyembre 28, 2016.

Niadtong Hulyo 22, 2016 si Cesante niduso sa maong mosyon kay nalapas ang iyang katungod. Giingong gilangan sa Ombudsman ang pagproseso ug disposition sa kaso batok kaniya.

Tipik sa motion ni Cesante nagkanayon nga walay gihatag nga katin-awan o pag-esplika ang Ombudsman nga niabot ngadto sa tulo ka tuig una pa nakompleto ang preliminary investigation sa kasong gipasaka batok kaniya.

Giingong ang kaso nga gipasaka batok kang Cesante simple ra ug wala na kinahanglana ang taas nga panahon aron kini ma-review. Giingong sa proceedings sa Ombudsman si Cesante walay obligasyon sa pag-follow up sa kaso apan niduso gihapon kini og duha ka Urgent Motions to Resolve aron ma-expedite ang kaso.

Giingong ang maong paglangan sa proseso sa kaso nakahatag og kahasol ug kabalaka ngadto kang Cesante.

Tipik usab sa order ni Cruz nga bisan pa og sa pagbasura sa ulahing kaso dili kini pasabot nga si Cesante nakalingkawas na sa civil liability.

Matud ni Cruz nga ang Section 2, Rule 111 sa Rules of Court nagkanayon nga ang acquittal o pagbasura sa kasong kriminal dili kini babag sa private offended party sa pagduso og kasong sibil base sa kalapasan niini sa balaod gawas kun ang judgement sa acquittal nideklara nga ang act o omission sa civil liability wala mo-exist. (BANAT NEWS)