Duha ka drayber ikiha tungod sa mama nga naligsan

CEBU, Philippines - Ang kapolisan sa Talisay mopasaka og kasong kriminal batok sa duha ka drayber nga responsable sa pagkamatay sa usa ka inahan nga napigsat human maligsi sa cement mixer truck kaniadtong miaging Martes. Ang gitakdang pasakaan og kaso nga reckless imprudence resulting to homicide mao si Jurry Manggay, ang drayber sa habal-habal nga gisakyan sa babayeng biktima ug si Ferdinand Gimenez nga drayber sa truck nga maoy nakaligis.

Si Manggay nga walay lisensya pagmaneho og sakyanan buot unta nga mo-overtake sa cement mixer truck apan wala siya makahimo kay adunay laing sakyanan nga gikasugat ug natumba na hinoon.

Ang biktima nga si Janet Eludo nag-angkas sa motor uban sa duha niya ka gagmay’ng anak nabuwag sa motor ug nahipunta sa karsada dayon naligsan sa truck didto sa Barangay Lawaan 1, Talisay.

Si PO1 Carlos Dicdican miingon nga ilang natimbang-timbang nga adunay kasaypanan ang duha ka drayber. Ang drayber sa habal-habal mi-overtake unta sa mixer apan dihang didto na siya sa pikas lane aduna siya’y gikasugat mao nga nipidpid siya sa mixer.

Ang mixer sab nilikay sa nag-parking nga sakyanan hinungdan nga naigo ang motorsiklo ug natumba, dayon naligsan si Eludo. Matud ni Dicdican nga bahala na ang korte nga motimbang-timbang kun kinsa gyud ang sad-an sa hitabo. Ang duha ka drayber pulos nangayo’g pasaylo sa kabanay sa namatay.

Kompleto sa lisensya ug dokumento ang drayber sa cement mixer truck apan walay lisensya ug walay rehistro ang motor sa habal-habal drayber.

Ang anak ni Eludo nga si John Cloyd, 13, niingon nga siya gyud unta to ang maligsan kay nakuyapan man siya kadiyot apan giduot siya sa iyang inahan hinungdan nga ang iyang mama ang napisat.

Si Felma Patata, 67-anyos nga inahan sa namatay mitug-an nga kaniadtong miaging semana niduaw kaniya ang iyang anak didto sa Pitalo, San Fernando ug mura’g nagmerida na kining daan.

Matud ni Patata nga giingnan ni Eludo ang iyang mga anak nga magsul-ob sila og itum nga sapot sa pagtambong nila sa husay sa kaso nga gipasaka niya batok sa iyang bana.

Gipasakaan ni Eludo og kaso ang iyang bana kay nakigtipon kini og laing babaye ug wala na mohatag kanila og sustento. Ang patay’ng lawas ni Eludo dad-on sa iyang inahan ngadto sa ilang lugar sa San Fernando. (BANAT NEWS)