Namasangil nga gibusohan, gipatay

CEBU, Philippines - Babayeng namasangil nga kanunay lili-on sa iyang silingang lalaki sa panahon nga maghilawas sila sa iyang hinigugma sulod sa kwarto nga iyang gi-abangan, gipusil-patay sa iyang gipasanginlan.

Nahitabo ang insidente sa Sitio Pilapil, Barangay Casuntingan, Dakbayan sa Mandaue pasado alas 6 sa miaging gabii.

Giila ni PO2 Rogie Cabra sa Presinto 4 sa Mandaue City Police ang biktima nga si Jessica Bituin, 38 anyos ug ang suspek mao si Lucio Pelones, 40 anyos.

Matud sa polis nga gisukmatan sa biktima ang suspek kun nganung manglili kini sa iyang lawak sa matag higayon nga makighilawas siya sa iyang hinigugma.

Nasuko ang suspek sa maong pasangil ug misangpot sa ilang init nga panaglalis hangtod nga gipusil niini ang biktima unom ka higayon.

Nahimong saksi sa tanang hitabo ang silingan sa duha nga si Brenda Cotanda. Dugang ni PO2 Cabra human mamusil daling misibat palayo sa dapit si Pelones mao nga wala na kini maabti sa mga mirespondeng polis. (BANAT NEWS)