Nahilo human sa boodle fight

CEBU, Philippines - Nangalanag sa ilang gipangaon ang 31 ka mga tinun-an ug magtutudlo sa San Roque National High School Grade 11 sa lungsod sa Alburquerque sa lalawigan sa Bohol atol sa ilang acquaintance party niadtong Martes sa udto.

Si Dr. Aracele Samar, ang Municipal Health Officer sa Alburquerque nitug-an sa Banat News nga 31 ka tawo ang nadala sa Governor Celestino Gallares Memorial Hospital sa Dakbayan sa Tagbilaran, diin 17 niini ang na-admit.

Sumala sa ilang pakisusi, nagtampo-tampo ang tanan alang sa ilang acquaintance party diin nag-boodle fight sila nga naglangkub sa mga pagkaon sama sa sinugba nga isda, baboy, kan-on nga hilaw-hilaw ug lata-lata, kinilaw, pansit ug uban pa nga buntag pa gisugdan og luto.

Dugang ni Samar, pagkagabii sa Martes, adunay gipanghilantan ug nagsuka kalibang hinungdan nga gidala kini sa tambalanan.

Gitug-an sa doktor nga kutob sa mga nakakaon, gipangsakitan sa ilang tiyan ug nagkalibanga.

Ang Regional Epidemiology and Surveillance Unit sa DOH nisugod na sa pag-imbistigar sa hitabo.

Matud ni Renan Cimafranca ang pangu sa RESU-7 nga kontaminasyon sa pagkaon ang ilang gitan-aw nga hinungdan sa pagkahilo diin 15 sa mga tinun-an ang nakakaon og kinilaw.

Ila karong gitan-aw nga posibleng hugaw nga tubig ang nasabaw sa kan-on nga maoy hinungdan sa kontaminasyon apan ila pa kining susihon.

Pahimangno sa DOH aron malikay sa sakit, segurohon nga lab-as ang isda ug limpyo ang tubig nga gamiton sa pagluto sa pagkaon. (BANAT NEWS)