10 ka pulis, positibo sa drug test
CEBU, Philippines - Miabot na sa napulo ka mga polis ang nagpositibo sa paggamit og gidili nga drugas sa nagpadayon nga drug testing sa mga sakop sa kapulisan dinhi sa rehiyon. Ug matud ni PRO7 Director PCSupt. Noli Taliño nga mag-atubang og kasong administratiba ang maong mga pulis.
Sa kinatibuk-an, miabot na sa 60 porsiyento sa tibuok sakop sa kapulisan sa rehiyon ang napaubos na sa drug test nga pinasikad sa kamanduan nga gipagawas ni PNP Chief Ronald “Bato” Dela Rosa sukad kini milingkod sa iyang katungdanan.
Sumala pa ni Taliño nga ang napulo ka mga pulis mahimong makahagit sa resulta sa drug test nga gihimo sa PNP Crime Laboratory.
Gawas nga mag-atubang og kasong administratiba, ang maong mga pulis ipa-ubos usab sa summary dismissal proceedings.
Human napaubos sa confirmatory test ang na-unang resulta sa drug test ug kini nagpositibo gihapon, hayan matangtang sa serbisyo ang maong mga polis.
Wala na gibutyag ni Taliño kun kinsa ug asa nadestino ang maong napulo ka mga pulis.
Isip kabahin sa hugot nga kampanya sa kapulisan kontra drugas si Taliño mipasabot nga magpadayon ang revamp sa puwesto sa kapulisan sa national, rehiyonal, probinsya ug mga nagkadaiyang dakbayan. (BANAT NEWS)
- Latest
