Botante giawhag di magpalingla
CEBU, Philippines - Giawhag ni Diocese of Dumaguete Bishop Julito Cortes ang mga first timer nga botante nga dili magpalingla sa lumalabay lang nga gasa atol sa eleksiyon.
Kini atol sa wali ni Cortes isip main celebrant sa ikatulong adlaw sa Triduum Mass sa ika-450 ka tuig sa Kaplag sa Balaang Bata nga si Senyor Santo Niño.
Si Cortes nanghinaut sa mga botante nga dili magpadala sa haylo sa kwarta tungod kay mahanaw lang kini apan ang pag-antus tungod sa “poor leadership” magpadayon hangtud sa kahangturan.
Matud ni Cortes nga angay pilion sa katawhan ang kandidato nga Diosnon.
Dugang ni Cortes nga ang Pilipinas nanginahanglan og mga opisyal nga adunay kahadlok sa Ginoo.
Si Cortes nipadayag nga adunay 10 commandments ug kinsa kadtong dili makatuman niini sa katawhan timaan kini nga nagkakunhod ang moralidad diin ang usa ka kandidato nga dili motoo sa balaud sa Dios daku og posibilidad nga mopadulong sa kaalaut ang katawhan.
Giawhag ni Cortes ang katawhan nga mobotar sila nga giniyahan sa ilang konsensiya alang sa kaugmaon sa kabataan, katawhan ug sa nasud ug dili tungod sa pagdawat nila sa kwarta. (BANAT NEWS)
- Latest
