‘Hired killer’ gipatay

CEBU, Philippines – Gituohang hired killer ang kritikal human gipusil sa wala mailhing mamumuno nga nagsakay og motorsiklo sa Barangay Biasong, Dakbayan sa Talisay niadto’ng Domingo sa hapon.

Ang biktima nailhan nga si Titus Morante, hingkod, nagpuyo sa nahisgutang lugar.

Si SPO1 Mikie Espina sa Talisay City Police Station nagkanayon nga ang biktima nagsakay sa iyang motorsiklo diha’ng gibirahan.

Asoy ni Espina nga ka usa ka higayon nga gipusil si Morante ug naigo sa iyang tangkugo hinungdan sa iyang pagkasukarap.

Gidali pagdala sa Talisay City Hospital ang biktima apan gibalhin sa Vicente Sotto Memorial Medical Center.

Sa pagsuwat niini’ng balita, si Espina nihulagway nga kritikal gihapon ang kahimtang ni Morante.

Si Morante ang gitudlo sa mga testigos sa pagpatay ni Rodulfo Cuyos Jr., 69-anyos, niadtong nilabay nga buwan. Ang pagpusil patay ni Cuyos may kalabutan sa yuta nga gipuy-an niini.

Dugang ni Espina nga si Morante modawat og ginagmay nga bayad aron lang nga mopatay. Gani nalambigit sab kini sa pagpanulis sa bisan asa nga dapit sa Talisay.

Niini’ng higayuna sa iya’ng pagkabiktima sa pagpamusil, si Espina nagtuo nga posibleng gibaslan siya o posibleng aduna kini wala igkasabot sa iyang mga kauban. – /GMR) (BANAT NEWS)