Pamilya na-buy bust

CEBU, Philippines - Usa ka pamilya lakip ang inahan nga usa ka maestra ang gisikop sa mga sakop sa Provincial Intelligence Branch sa Cebu Provincial Police Office atol sa buy-bust operation sa Brgy. Campo, San Francisco sa lungsod sa Camotes niadtong nakalabay nga tungang gabii diin kapin sa dos milyones pesos nga kantidad sa shabu ang nasakmit sa mga otoridad.

Nadakpan sa maong operasyon mao sila si Maria Jocelyn Arquillano, 52, maestra ug ang iyang bana nga si Diosdado, 54, ilang tulo ka mga anak nga sila si Richard Jean, 27, Dodie, 18, Debie Sychel, 23, nga gikatahong naaktohan pang nag-repack og shabu atol sa pagronda sa mga pulis.

Lakip sa nasikop ang handler og manok sa pamilya nga si Giovanie Pautan, 28, ug usa ka 17 anyos nga minor nga gikostudiya karon sa kapulisan.

Matud pa ni Superintendent Rodolfo Albotra, hepe sa PIB sa CPPO armado ang iyang mga sakop sa search warrant nga gi-isyu ni Judge Jerry Dicdican sa RTC Branch 25 sa Dakbayan sa Danao, diin target nila sa maong operasyon ang magtiayon.

Sumala pa ni Albotra nga usa ka kasaligan nga impormasyon usab ang ilang nadawat nga adunay bag-ong supply sa drugas nga nadawat ang mga suspetsado maong gilusad nila ang operasyon human sa tulo ka semanang surveillance.

Lima ka medium size packs, 140 ka gagmay nga pakete nga mitimbang og 177 gramos ang nasakmit sa kapulisan nga mikantidad og P2, 088, 600.

Nasakmit usab sa kapulisan ang duha ka KG9 submachine pistols, usa ka .45 caliber pistol, P15 mil nga kwarta, mga resibo sa pagpadala og kuwarta ug mga drug paraphernalia.

Si Maria Jocelyn nagtudlo sa pampublikong tunghaan sa high school sulod sa 22 ka tuig, kusganong mihimakak sa pasangil kay matud niya nakuha ang shabu gikan sa lain nga balay ug dili sa ila.

Apan miangkon siya nga piyansado ang iyang bana sa kaso sa pagpamaligya og shabu.

Samtang ang bana sa maestra hugtanong milimod sa pasangil apan  miangkong iyaha ang mga armas ug  wala  malambigit sa ginadiling drugas iyang mga anak.

Ang hepe sa Cebu Provincial Anti-Drug Abuse Commission (CPADAC)  nga si Joey Herrera, mibutyag nga nakigtigom siya kang Dr. Jaime Bernadas sa Department of Health (DOH) sa rehiyon bahin sa problema sa drugas.

Ang ilang masabutan ipresentar ngadto sa committee meeting aron mapahibalo si Dr. Rhea Mar Angtud, Cebu Provincial Schools Superintendent sa Department of Education (DepEd)bahin sa drug test sa mga magtutudlo.

Sa milabay’ng tuig, unom ka magtutudlo ang naa sa ilang watchlist ug duha kanila ang nadakpan na samtang kining nadakpang magtutudlo sa San Francisco nga si Arquillano wala pa malakip sa ilang listahan. (BANAT NEWS)