Pito nadakpan sa hantak
CEBU, Philippines – Nadakpan sa kapolisan sa Dakbayan sa Carcar ang pito ka lalaki nga naatlan nga naghantak sa niagi’ng tunga’ng gabii sa Barangay Ocaña.
Ang mga nasikop naglakip nila ni Vincent Dinglasa, 32; Danilo Labra, 34; Humphrey Powao, 36; Ryle Trazona, 21; Marthy Alcordo, 27; Randolph Orador, 30; Wynmer Orador, 31, nga molupyo ra sab sa mao’ng lugar.
Pasado alas 12 sa tunga’ng gabii may usa ka concerned citizen ang nitawag sa kapolisan labot sa grupo sa kalalakin-an nga naghantak sa Sitio Bacsije hinungdan nga ila kini’ng girespondehan.
Sa pag-abot nila sa lugar nag-alibwag ang mga lalaki nga nanaghantak apan nasipong nila ang pito. Narekober sa kapolisan ang antugan ug ang antugon nga ila’ng gigamit lakip na sa P756 nga salapi nga pusta sa mga dinakpan.
Gidala ang pito sa Carcar City Police Station diin sila kasamtangang natanggong ug pasakaan og kaso’ng kalapasan sa Presidential Decree 1602 kon pagsugal. Ang mao’ng kampanya pinasubay sa mando sa Police Regional Office-7 nga hingusgan ang pagpakigbatok sa ilegal nga sugal. – /GMR) (BANAT NEWS)
- Latest
