Relocation sa taga Apas ipadali
CEBU, Philippines – Gipadali sa konseho sa dakbayan sa Sugbo ang pagpalit sa relocation site sa Binaliw alang sa 150 nga apektado sa pag-demolis sunod tuig sa barangay Apas.
Buot sa San Miguel Archangel Residents Association, Inc. nga gipangulohan ni Rosalinda Leogan nga may luna na sila nga kabalhinan sa dili pa ang Marso 2016.
Si Konsehal Margarita “Margot” Osmeña nipasalig nga mohatag sila og pagtugot kang Mayor Michael Rama nga makig-negosasyon kang Jerry Santa Ana, ang tag-iya sa luna.
Samtang ang pangulo sa committee on housing, Konsehal Alvin Dizon, nagkanayon nga niadto’ng Septiyembre 23 nadawat sa konseho ang hangyo sa mga residente kalabot sa pagpatabang sa paghangyo sa kagamhanan sa pagpalit sa yuta.
Ang mga residente sa San Miguel gihatagan na lang hangtud sa Marso 2016 sa pagpuyo sa Apas diin adunay 110 ka istruktura ang gikatakda nga gub-on. – /GMR) (BANAT NEWS)
- Latest
