PB Sanchez nakurat sa kasal ni Greco
CEBU, Philippines – Nakurat si Bokal Grecilda Sanchez sa pagpakasal sa iya’ng manghud nga si Leodereco “Greco” Sanchez kang Cebu City Assistant Prosecutor Mary Ann Castro.
Matud niya nga wala siya nasayud sa relasyon sa duha.
“Kana man gud nga ingon ana nga ato’ng gisudlan sa kaminyuon dili gyud na sayon…actually I was shocked kay wala ko kahibalo nga naa diay na (relasyon ni Greco ug Castro) that existed because he was with his family before and recently,” matud ni Sanchez.
Apan sumala pa ni Sanchez nga bisan unsaon iya’ng igsuon si Greco.
Niadto’ng Agosto 18, si Greco ug Castro gikasal ubos sa Muslim rite nga gipahigayun sa Harolds Hotel, dakbayan sa Sugbo nga gitambongan sa ila’ng kahigalaan ug mga sakop sa pamilya.
Si Castro annulled na sa kasal sa una’ng bana samtang si Greco anaa pa sa korte ang kaso.
Giingong si Greco ug Castro nagkarelasyon ug wala pa moabot sa usa ka tuig nagsabot na nga magminyo.
Si Castro nikompirmar nga nagpa-convert sila’ng duha ni Greco sa Islam aron sila makasal.
Lakip sa nitambong sa kasal ang 22-anyos nga anak ni Greco ug ang mga ig-agaw niini ug ang anak nga lalaki ni Castro. – /GMR) (BANAT NEWS)
- Latest
