Anak ni Byron Garcia naghikog?
Jojo C.Ugdol (Banat) - December 11, 2014 - 12:00am

CEBU, Philippines – Hangtud karon wala pa masayod ang kapolisan sa Talisay kun unsa’y posible nga hinungdan nga nagpakamatay ang usa sa mga apo ni kanhi gobernador Pablo Garcia.

Si Gail Mae Garcia, 18, dalaga ug anak ni kanhi Capitol consultant Byron Garcia, gituohan nga nagpusil sa iyang ulo sulod sa ilang panimalay sa Corona del Mar Subdivision sa Barangay Pooc, Talisay  niadto’ng Martes sa gabii.

Apan ang iyang amahan nagdumili pagtug-an sa hitabo ngadto sa kapolisan. Ang mga polis nga miadto unta sa panimalay ni Byron aron mohimo’g pakisusi wala pasudla sa mga guwardiya.

Matud ni SPO1 Benjamin Sebellita sa Talisay City police homicide section nga limitado kaayo ang nakuha nila’ng impormasyon sa mao nga hitabo kay wala ‘sab mokooperar kanila ang pamilya’ng Garcia.

Sayo sa gabii kaniadto’ng Martes, ang kapolisan sa Talisay nakadawat og inpormasyon gikan sa South General Hospital sa Naga nga nagpahibalo nga adunay pasyente nga gidala sa ilang tambalanan nga naglambigit og medico-legal case.

Pag-adto sa kapolisan sa ospital didto na nga ilang nasayran nga ang biktima nga giingong naghikog anak diay ni Byron Garcia.

Ang mga polis namauli nga minghoy ug wala g’yuy nakuha nga inpormasyon kabahin sa hitabo. Pagbalik sa mga polis didto sa ospital ila na nga naabtan si Byron apan nagdumili paghatag og inpormasyon.

Matud ni Sebellita nga si Byron naghilak pa ug mihangyo gani kaniya si Garcia nga dili na lang itala sa blotter ang hitabo.

Sa nakuha nga inpormasyon sa kapolisan gikan sa nurse on duty sa ospital nga ang biktima may samad pinusilan sa ulo ug patay na nga naabot sa tambalanan.

Ang mga guwardiya sa subdivision giingong wala makadungog og buto sa armas ug nakita na lang nila nga nagdali’ng migawas si Byron sa subdivision luwan sa iyang sakyanan ug ingon sa duna’y emerhensiya.

Nagtuo si Sebellita nga posible’ng naghikog g’yud si Gail Mae kay wala may plano ang pamilya nga pa-imbestigaran pa kini sa kapolisan.

Usa sa mga nagpabilin nga tanghaga sa kapolisan kun asa gikan og armas ang anak ni Byron o kun kini gipanag-iya ba sa iyang amahan. Nahibaw-an hinuon nga si Byron daghan og mga armas. – /RUB) (BANAT NEWS)

BARANGAY POOC BENJAMIN SEBELLITA BYRON BYRON GARCIA GAIL MAE GARCIA KAPOLISAN
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with