Gikan nagbilyar gipusil patay
CEBU, Philippines - Patay ang usa ka lalaki human gipusil sa usa sa tulo ka lalaking nagmotorsiklo samtang kini nagduwa og billiards diha sa Holy Trinity Street, Barangay Hipodromo sa miaging gabii.
Ang biktima naila nga si Jimilito Branzuela, 33, molupyo sa nahisgotan nga lugar. Base sa imbestigasyon nga gihimo sa Homicide Section nga gipangulohan ni Senior Police Officer 4 Rey Cuyos nga ang biktima kuyog sa iyang mga higala nga nagduwa og billiards sa maong lugar.
Matud pa nga kalit lang miabot ang tulo ka mga lalaki sa maong lugar sakay sa motorsiklo, ang usa mikanaog ug maoy mipusil sa ulo sa biktima pipila ka higayon ug misibat dayon kini human sa maong hitabo.
Wala na madala pa sa tambalanan si Branzuela tungod kay namatay kini dayon tungod sa igo sa luyo sa ulo ug tuo nga aping.
Narekober sa kapolisan ang tulo ka kabhang sa bala sa .9mm diha sa crime scene. Padayon pa ang kapolisan sa ilang imbestigasyon kung unsay motibo sa maong pagpatay. (BANAT NEWS)
- Latest
