Mandaue gusto nga mahimong motorist-friendly

CEBU, Philippines -  Ang mga opisyal sa dakbayan sa Mandaue nagplano nga magbutang sila og mga Digital Electronics Advisory screens diha sa lainlaing eskena aron nga mohatag og inpormasyon sa katawhan ug sa mga motorista.

Hinoon ang administrasyon ni Mayor Jonas Cortes mangita pa og igo nga gahin niini nga proyekto nga idungan nila sa pagpalit og dugang pa nga Digital Traffic systems sama sa gipahimutang na nila sa siyam ka nag-una nga karsada sa Mandaue.

Gusto ni Mayor Cortes nga mapatuman na unta ang Phase 2 sa labing una sa Sugbo nga fiber optic traffic control system nga maglakip na unya sa mga digital electronic advisory.

Maghatag kini og kasayuran sa mga drayber kun asa nga mga karsada nga dili angay’ng agian kay huot kaayo ang mga sakyanan.

Si Peter Ong, presidente sa Triune Electronic System, Inc.  miingon nga kun masayod ang mga drayber sa mga karsada nga grabe ang trapiko mahimo sila nga makapangita og laing kaagian.

Gawas sa pagbutang og mga Close Circuit Television (CCTV) camera sa mga eskena nga adunay gitaud nga moderno’ng traffic lights, butangan na unya og Digital Electronics Advisory nga magamit bisan sa pagpahibalo sa publiko kabahin sa mga bagyo ug ubang kasayuran.   (BANAT NEWS)